२५ असोज, झापा ।
अन्तर्राष्ट्रिय बालिका दिवसको अवसरमा नगर बाल सञ्जाल दमकको आयोजनामा भर्चुअल प्रदेश बालिका सम्मेलन सम्पन्न भएको छ । दमक नगरपालिकाको समन्वय र इटहरी , कनकाई, कमल पालिकास्तरीय बाल सञ्जालको सहकार्यमा भर्चुअल मार्फत सम्मेलन सम्पन्न गरेको हो ।
असोज २४ र २५ गते दुईदिन सम्म चलेको सम्मेलनमा कानून , न्याय तथा संसदीय मामिला मन्त्री डा.शिवमाया तुम्बाहाम्फे प्रमुख अतिथि रहेकी थिइन् । त्यस्तै अन्य अतिथि अतिथि वक्ताका रुपमा प्रदेश १ की सामाजिक विकास राज्यमन्त्री जसमाया गजमेर , माइती नेपालकी संस्थापक अध्यक्ष अनुराधा कोइराला , मिस नेपाल २०१८ श्रृङखला खतिवडा , नेपाल प्रहरी महिला बालबालिका सेवा केन्द्रकी डि.एस.पि. छिरिङ किप्पा लामा , दमक नगरपालिकाकी उपप्रमुख गिता अधिकारी, कन्सोर्टियम नेपाल प्रदेश नं १ की प्रदेश संयोजक स्वस्तिका पोखरेल , बालिका तथा महिला अधिकारकर्मी अस्मिता सापकोटा रहेका थिए ।
सो अवसरमा बालिकासँग मनोसामाजिक परामर्श , बालिका विरुद्धका हिंसा , बालिका दुव्र्यवहार र यसबाट बच्ने उपाय साथै बालिका सम्बन्धी कानूनी प्रावधान र राष्ट्रका नीतिका बारेमा बालिकालाई जानकारी गराई बालिकालाई सचेत बनाइएको आयोजकले जनाएको छ ।
‘सक्षम बालिका समृद्ध प्रदेश’भन्ने नाराका साथ सञ्चालन गरिएको सम्मेलनमा पोखरेलले मनोसामाजिक परामर्श, श्रृङखला खतिवडाले महिनावारी तथा छाउपडी प्रथा, कोइरालाले चेलिबेटी बेचविखन तथा बालिका हिंसा , अधिकारीले दमकमा बालिकाको अवस्था र दमक नगरपालिकाका कार्यहरुकाहरुको बारेमा, सापकोटाले बालिका हिंसा दुव्र्यवहार, लामाले नेपाल प्रहरीको तथ्यांक र बालिका सम्बन्धित कानूनी प्रावधान र हिंसा भए के गर्ने साथै राज्यमन्त्री गजमेर र संसदीय मामिला मन्त्री डा. तुम्बाहाम्फेले राज्यका नीति साथै आगामी दिनमा बालिका हिंसा न्युनिकरण गर्न कानूनी साथै नीतिगत व्यवस्था गरि सुधार गर्नुपर्नेमा जोड दिएका थिए ।
प्रदेश १ का सबै स्थानीय तहलाई आमन्त्रण गरिएको सम्मेलनमा पहिलो दिन २ सय र दोस्रो दिन १ सय ५० बालिका सहभागी भएकाे कार्यक्रम संयाेजक प्रेनुशा पाण्डेले जानकारी दिइन् ।
