१४ मंसिर, काठमाडौं ।
नेपाल भ्रमणमा रहेका चीनको राज्यपरिषद् सदस्य तथा रक्षामन्त्री वेइ फेङ्हे र प्रधानमन्त्री केपी शर्मा ओलीबीच भेटवार्ता भएको छ ।
फेङ्हेले प्रधानमन्त्रीको सरकारी निवास बालुवाटारमा प्रधानमन्त्री ओलीसँग भेट गरेका हुन् । हाल रक्षामन्त्रालयको जिम्मेवारी पनि प्रधानमन्त्री ओलीले नै लिएका छन् । भेटमा आपसी सहयोग र सहकार्यका विषयमा छलफल भएको छ ।
आइतबार नेपाल भ्रमणमा आएका फेङ्हेले प्रधानमन्त्रीसँग भेट गर्नुअघि नेपाली सेनाको जंगीअड्डामा प्रधानसेनापति पूर्णचन्द्र थापासँग भेटवार्ता गरेका थिए ।
उनले केहीबेरमा राष्ट्रपति विद्यादेवी भण्डारीसँग पनि भेट्ने कार्यक्रम छ । उनी सोमबार स्वदेश फर्किने जनाइएकाे छ।
