२३ मंसिर, काठमाडौँ ।
प्रधानमन्त्री केपी शर्मा ओलीको आह्वानमा सुरु भएको सर्वदलीय बैठक सम्पन्न भएको छ । प्रधानमन्त्री केपी शर्मा ओलीले जनताको सङ्घर्षबाट प्राप्त सङ्घीय लोकतान्त्रिक गणतन्त्रको उपलब्धिको रक्षाका लागि सबै परिवर्तनकारी दल र शक्ति एक जुट हुन आह्वान गरेका छन् ।
सङ्घीय संसद्मा प्रतिनिधित्व गर्ने राष्ट्रिय दलहरुको सर्वदलीय बैठकमा प्रधानमन्त्री ओलीले नेताहरुलाई स्वागत गर्दै पछिल्ला दिनमा प्रतिगमनका नाममा भएका संविधानविरोधी र हिंसात्मक गतिविधि सह्य नहुने स्पष्ट गरे ।
प्रधानमन्त्री निवास बालुवाटारमा आज बसेको बैठकमा समसामायीक राजनैतिक घटनाक्रम र कोभिड नियन्त्रणमा सरकारको भूमिका लगायतका विषयमा छलफल भएको सहभागी दलहरूले बताएका छन् ।
बैठकमा सहभागी नेपाली काँग्रेसका सह महामन्त्री प्रकाश शरण महतले सरकारले प्रभावकारी कार्य सम्पादन गर्न नसक्नु र कोभिड नियन्त्रणमा समेत असफल भएकाले वर्तमान राजनैतिक घटनाक्रम विकसित भएको भन्ने धारण आफूहरूले राखेको जानकारी दिए ।
डा. महतले वर्तमान शासन प्रणालीप्रति प्रश्न चिन्ह खडा गरी गरिएका र भइरहेका आन्दोलन प्रति काँग्रेस पार्टीको सहयोग नरहने भन्दै जनताका हकहितमा काम गर्न सरकारको ध्यानाकर्षण गराइएको जानकारी दिए ।
बैठकमा उठेका प्रश्नको जवाफ दिँदै प्रधानमन्त्री केपी शर्मा ओलीले सहभागीहरूको सुझावलाई सकारात्मक रुपमा लिई सरकारले काम गर्ने प्रतिबद्धता व्यक्त गर्नुभएको काँग्रेसका सह महामन्त्री डा महतले जानकारी दिए ।
बैठकमा सत्तारुढ नेपाल कम्युनिस्ट पार्टीका अध्यक्ष एवं प्रधानमन्त्री केपी शर्मा ओली, अर्का अध्यक्ष पुष्पकमल दाहाल प्रचण्ड, वरिष्ठ नेताहरू माधवकुमार नेपाल र झलनाथ खनाल, उपाध्यक्ष बामदेव गौतम, उपप्रधानमन्त्री ईश्वर पोखरेल, अर्थमन्त्री एवं महासचिव विष्णु पौडेल र संसदीय दलका उपनेता सुभाष नेम्वाङ सहभागी थिए ।
सर्वदलीय बैठकमा प्रमुख प्रतिपक्षी दल नेपाली काँग्रेसबाट सभापति शेरबहादुर देउवा, वरिष्ठ नेता रामचन्द्र पौडेल, उपसभापति विजयकुमार गच्छदार, नेता कृष्णप्रसाद सिटौला र डाक्टर प्रकाश शरण महत सहभागी थिए।
त्यस्तै बैठकमा सङ्घीय समाजवादी पार्टीका तर्फबाट नेताहरू महन्थ ठाकुर र उपेन्द्र यादव सहभागी थिए।
