१ पुष, काठमाडौं । गृह मन्त्रालयले शीतलहर र हिमपातबाट नागरिकलाई जोगाउन पूर्व तयारी सुरु भएको जनाएको छ । मन्त्रालयकाअनुसार सबै जिल्लामा चरणबद्ध रुपमा राहत वितरण र पुनःस्थापनका कार्यक्रम तय गरी पूर्व तयारीका कार्यक्रम सुरु भएको हो ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत अनिल पोखरेलले सूचना सङ्कलनदेखि विपद् हुन नदिन र भइहालेमा उद्धार, राहत वितरण तथा पुनःस्थापनका कार्यक्रम तय गरी तयारी थालिएको जानकारी दिए । राहत, आश्रयस्थलको व्यवस्थापकीय कार्यसमेत तत्काल प्रबन्ध गर्ने गरी कार्यक्रम अघि बढेको पोखरेलले बताए ।
‘शीतलहर तथा हिमपात विपद् जोखिम न्यूनीकरण तथा प्रतिकार्य मार्ग दर्शन २०७७’ मन्त्रालयले लागू गरेको छ । त्यसैअनुसार स्थानीय र जिल्ला विपद् व्यवस्थापन समितिले तत्कालै अवस्था अध्ययन गरी विवरण सङकलन गर्ने, साधनस्रोतको कमी रहे/नरहेको पहिचान गरी त्यसको जोहो गर्ने तथा अपुग सामग्री केन्द्रमा माग गर्नुपर्ने छ ।
तल्लो तहबाट आएको प्रतिवेदनका आधारमा सङ्घीय सरकारबाट आवश्यक सहयोग तथा व्यवस्थापनका कार्यक्रम सञ्चालन गर्ने भएको छ । विगत १० वर्षको तथ्याङ्क हेर्दा देशमा शीतलहरका कारण ११६ जनाले ज्यान गुमाएका छन् भने चार सयको उद्धार भएको प्राधिकरणले जनाएको छ ।
शीतलहरबाट सुनसरी, सप्तरी, सिराहा, धनुषा, महोत्तरी, सर्लाही, रौतहट, बारा, पर्सा, नवलपरासी, कपिलवस्तुलगायत ११ जिल्लाका नागरिक बढी प्रभावित हुने गरेका छन् । शीतलहरबाट कम प्रभावित जिल्लामा झापा, मोरङ, उदयपुर, चितवन, दाङ, बाँके, बर्दिया, कैलाली, कञ्चनपुर गरी ११ वटा जिल्ला रहेको छ ।
हिमपातबाट ताप्लेजुङ्, संखुवासभा, दोलखा, सिन्धुपाल्चोक, रसुवा, मनाङ, मुस्ताङ डोल्पा, जुम्ला, मुगु, हुम्ला, कालिकोट, बाजुरा, बझाङ, दार्चुला, धादिङ, रामेछाप, गोरखा, रुकुमपूर्व, म्याग्दी गरी २१ जिल्ला बढी प्रभावित हुने गरेका छन् ।
