५ पुष, काठमाडौं । प्रधानमन्त्री केपी शर्मा ओलीले स्वेच्छाचारी र असंवैधानिक ढंगले संसद भंग गरेको प्रति आपत्ति जनाउँदै सत्तारुढ नेपाल कम्युनिस्ट पार्टी (नेकपा)सहित ३ दलले संयुक्त प्रतिवाद गर्ने भएका छन् ।
नेकपा, नेपाली कांग्रेस र जनता समाजवादी पार्टी (जसपा)का नेताहरुको वैठकमा संसद विघटनको संयुक्त रुपमा प्रतिवाद गर्ने सहमति भएको हो । सत्तारुढ नेकपाको पहलमा तीन दलका नेताहरुको बैठक कांग्रेस संसदीय दलको कार्यालय, सिंहदरबारमा बसेको वैठकले प्रधानमन्त्री ओली र राष्ट्रपति विद्यादेवी भण्डारीको कदम अलोकतान्त्रीक र असंवैधानिक भएको निष्कर्ष निकालेको छ । बैठकमा नेकपाका वरिष्ठ नेता माधवकुमार नेपाल, झलनाथ खनाल, नारायणकाजी श्रेष्ठ ‘प्रकाश’ र देव गुरुङ थिए भने कांग्रेसका वरिष्ठ नेता रामचन्द्र पौडेल, प्रमुख सचेतक बालकृष्ण खाँड र मिनेन्द्र रिजाल तथा जसपाका डा. बाबुराम भट्टराई र राजेन्द्र महतो थिए ।
