६ पुष, काठमाडौं । २०७५ को जेठ ३ गते दक्षिण एसियाकै ठूलो कम्युनिष्ट पार्टीको रुपमा नेपाल कम्युनिष्ट पार्टी घोषणा भयो । दुई ठुला कम्युनिष्ट घटक नेकपा एमाले र माओवादी केन्द्र मिलेर ‘नेपाल कम्युनिष्ट पार्टी’ बनाए, जसमा दुई अध्यक्ष केपी शर्मा ओली र पुष्पकमल दाहाल प्रचण्ड रहने भए । एकतासँगै संघीय सरकारसँगै ६ वटा प्रदेशका सरकार एकल बहुमतको भयो । तर एकताको अढाई वर्ष पुग्दैगर्दा आन्तरिक विवाद यसरी बढ्यो कि एक अध्यक्षले अर्का अध्यक्षलाई कारबाही गर्न स्थायी कमिटीबाट प्रस्ताव पारित गर्नेसम्म पुग्यो । त्यतिमात्र होइन अध्यक्ष ओलीले अध्यक्ष प्रचण्ड उपाध्यक्ष सरह भएको भनि अभिव्यक्ति समेत दिए । एसियामा चीन र भियतनामपछि ‘नेपाल कम्युनिष्ट पार्टी’ तेस्रो ठूलो कम्युनिष्ट पार्टी बनेको थियो । एकताका बखत ६ बुँदे घोषणापत्र एकता जारी गर्दै नेताहरुले आफूहरुको लक्ष्य जनतालाई सुखी र समृद्ध बनाउनु भएको बताएका थिए । तर त्यहि नेपाल कम्युनिष्ट पार्टीको सरकारले देखाएका सपनाको एक छेउ पनि पुरा गर्न नपाउँदै कोरोना महामारीकाबीचमा मध्यावधि निर्वाचन घोषणा गर्यो । पूर्व माओवादी र पूर्व एमालेका बहुमत सांसदहरु अध्यक्ष ओलीको विपक्षमा छन् । कोरोना संक्रमितको उपचार खर्च ब्यहोर्न आनाकानी गर्ने सरकारले आन्तरिक विवाद मिलाउन नसक्दा राज्यलाई अनावश्यक अर्बौ खर्चको भार बोक्न बाध्य पारिरहेको त छ नै दक्षिण एसियाकै ठूलो कम्युनिष्ट पार्टी विभाजनको संघारमा परेको छ ।
