१६ पुस, काठमाडौँ ।
नेकपाका अध्यक्ष पुष्पकमल दाहालकी पत्नी सीता दाहालको स्वास्थ्य अवस्था बुझ्न ओली समूहका महासचिव विष्णु पौडेल र स्थायी कमिटी सदस्य सुवास नेम्बाङ मेडिसिटी अस्पताल पुगेका छन् । उनीहरुले बुधबार साँझ दाहालको अवस्था बुझेर स्वास्थ्य लाभको कामना गरेका हुन् ।
पौडेलका स्वकीय सचिव याम पाण्डेका अनुसार उनीहरुले प्रधानमन्त्री केपी शर्मा ओलीकातर्फबाट पनि स्वास्थ्य लाभको सन्देश दिएका थिए ।
बुधबार प्रधानमन्त्री ओलीले पुष्पकमल दाहाललाई फोन गरेर पत्नी सीता दाहालको स्वास्थ्य अवस्था बुझेका छन् । उनले सीता दाहालको स्वास्थ्य लाभको कामना समेत गरेको पाण्डेले बताए ।
