१८ पुस, काठमाडौं ।
नेपाल कम्युनिस्ट पार्टी (नेकपा) का अध्यक्ष केपी शर्मा ओलीपक्षको भेला आज काठमाडौंमा हुँदै छ।
राजनीतिक रूपमा पार्टी विभाजन भएको अवस्थाकाबीच प्रधानमन्त्रीसमेत रहेका अध्यक्ष ओलीपक्षको भेला दिउँसो १ बजे हुन लागेको हो। ओलीपक्षको काठमाडौं जिल्ला कमिटीले आयोजना गरेको भेला नेपाल प्रज्ञा प्रतिष्ठान कमलादीमा हुनेछ।
भेलालाई प्रधानमन्त्री ओलीसँगै गृहमन्त्री रामबहादुर थापा, प्रधानमन्त्री तथा मन्त्रिपरिषद् कार्यालय हेर्दै आएका मन्त्री ईश्वर पोखरेल र शिक्षामन्त्री कृष्णगोपाल श्रेष्ठले सम्बोधन गर्नेछन्।
गत बुधबार बबरमहलस्थित कार्की ब्याङ्क्वेटमा ओलीपक्षको सुदूरपश्चिम प्रदेशका कार्यकर्ताहरूको भेला भएको थियो। गत पुस ५ गते ताजा जनादेशमा जाने भन्दै प्रधानमन्त्री ओलीले गरेको सिफारिसको आधारमा राष्ट्रपति विद्यादेवी भण्डारीले प्रतिनिधिसभा विघटन गरेकी थिइन्।
प्रतिनिधिसभा विघटनलाई लिएर नेकपाका अर्का अध्यक्ष पुष्पकमल दाहाल ‘प्रचण्ड’ र नेता माधवकुमार नेपाल ‘प्रचण्ड-नेपाल’ समूह असन्तुष्ट बनेको छ। त्यसपछि, राजनीतिक रूपमा विभाजित नेकपाको अध्यक्ष ओलीपक्ष र ‘प्रचण्ड-नेपाल’ पक्षले छुट्टा–छुट्टै भेला गर्दै आएका छन्।
