१९ पुस, हुम्ला ।
हुम्लामा आज दिउसोदेखि हिमपात भएको छ ।
आज बिहानदेखि मौसम बदलीसंगै सदरमुकाम सिमकोटसहित उत्तरी क्षेत्रमा हिमपात हुँदा चिसो अत्यधिक बढेको र जनजीवन कष्टकर भएको स्थानीयले बताएका छन् ।
हिमपातपछि तापक्रम माइनसममा झरेसँगै सदरमुकाम सिमकोटसहित उत्तरी नाम्खा गाउँपालिकामा अत्यधिक चिसो बढ्दा घरबाहिर निस्कन समस्या भएको हिल्सा सीमा सुरक्षामा खटिएका हिल्सा विपओपीका इन्चार्ज सुरज केसीले जानकारी दिए।
हिमपातले बाँझो जमिन खनजोत गर्न सहज हुने र हिउँदे बालीनाली सप्रने भन्दै कृषकमा खुसीयाली छाएको नाम्खाका स्थानीयवासी हेमन्त बोहराले बताए ।
यस्तै, पश्चिमी वायुका कारण आजदेखि केही दिन देशका धेरैजसो भू–भागमा बदली, वर्षा र हिमपात हुने सम्भावना रहेको मौसम पूर्वानुमान महाशाखाले जनाएको छ ।
वायुको प्रभाव पुस २२ गतेपछि कमजोर हुँदै जाने छ । बदली, वर्षा र हिमपातका कारण अधिकतम र न्यूनतम तापक्रम केही गिरावट आई देशभर चिसो बढ्ने सम्भावना रहेकाले चिसोबाट बच्न तथा स्वास्थ्यमा थप सजक रहनुहुन महाशाखाले सबैमा अनुरोध गरेको छ ।
