२० पुस, काठमाडौं ।
प्रधानमन्त्री केपी शर्मा ओलीले रुकुम पश्चिमको सोतीमा ६ जनाको हत्या हुने गरी भएको घटनाका दोषीलाई हदैसम्मको कारबाही गर्न सरकार प्रतिबद्ध रहेको बताएका छन् ।
आइतबार अपराह्न प्रधानमन्त्री निवास बलुवाटारमा भएको पीडितसँगको भेटमा प्रधानमन्त्रीले दाेषीलाई कारबाही गर्ने कुरामा सरकारले कसैसँग मोलाइजा नगर्ने बताएका हुन् ।
गत १० जेठमा अन्तरजातीय बिहेको नाउँमा भएको उक्त घटनामा नवराज विक र उनका पाँच जना साथीको हत्या भएको थियो । उक्त मुद्दा अदालतमा विचाराधीन रहेको छ । हत्यामा संलग्न पक्राउ परेका ३४ जनामध्ये ६ जनालाई अदालतले थुनामुक्त गरेको छ । अन्य छ जनालाई छोड्ने विषयमा उच्च अदालत सुर्खेतमा मत बाझिएपछि सर्वोच्चसम्म आइपुगेको छ ।
कीर्तिपुर आन्दोलनले संयोजन गरेको प्रधानमन्त्रीको उक्त भेटमा मृतक छ जनाकै अभिभावक उपस्थित थिए । भेटमा प्रधानमन्त्री ओलीले भने, ‘घटना दुःखदायी हो । तर, घटना र पीडा मेटाउन सकिँदैन । तर, पीडितका आफन्तलाई राहत दिने र घाइतेहरुको उपचार र दाेषीलाई हदैसम्मको दण्ड गर्ने कुरामा सरकार प्रतिबद्ध छ ।’ मृतकका अविभावकलाई प्रधानमन्त्री ओलीले न्याय पाउनेमा विश्वस्त पारेको कीर्तिपुर आन्दोलनका रामलाल विश्वकर्माले बताए ।
प्रधानमन्त्रीसँगको भेटमा मृतक नवराज विकका बुबा-आमा मुनलाल र उर्मिला, लोकेन्द्र सुनारकी आमा लक्ष्मी, टिकाराम नेपालीका बुबा सोभे, गणेश बुढाका बुबा पदमबहादर, गोविन्द शाहीकी आमा भीमकुमारी र सञ्जु विककी आमा सविता उपस्थिति भएको विश्वकर्माले बताए । मृतकका अविभावक गत बिहीबार साँझ काठमाडौं आइपुगेका हुन् ।
भेटमा मृतकको अभिभावकले अहिलेसम्म अदालतले घाइतेहरुको वयान नलिएकोभन्दै प्रधानमन्त्रीसमक्ष दुखेसो पाखेका थिए । प्रधानमन्त्रीले न्याय दिलाउनको लागि अहिलेको सरकार कुनै शक्तिसँग सम्झौता नगर्ने पनि उल्लेख गरे ।
