२२ पुस, विराटनगर ।
नेपाली कांग्रेसका नेता गगन थापाले संविधानमा ‘कु’ हुँदा समेत नबोल्ने संविधानसभाका अध्यक्ष सुवासचन्द्र नेम्वाङको निरीहताप्रति आफूलाई दया लागेको टिप्पणी गरेका छन् ।
प्रतिनिधिसभा विघटनविरुद्ध आजदेखि सर्वोच्च अदालतमा बहस सुरु हुन लागेको सन्दर्भमा सामाजिक सञ्जालमा स्टाटस लेख्दै उनले सो टिप्पणी गरेका छन् ।
उनले लेखेका छन्, ‘मलाई लागेको थियो यो संकटमा मेरो अध्यक्षले अदालतमै उभिएर–‘श्रीमान् प्रधानमन्त्री ओलीले गर्नुभएको प्रतिनिधिसभा विघटन असंवैधानिक हो ।
मेरो नेतृत्वमा बनाएको संविधानमा यस्तो प्रावधान लेखिएकै छैन र विधायिकी मनसाय यस्तो हुँदै होइन’ भनेर सन्दर्भ सहित जमेर बहस गर्नुहुनेछ । अफसोच उहाँ त कसैले केही सोध्लान की भनेर लुकेर बस्नुभएको छ, प्रश्नबाट भाग्नुभएको छ ।
आफैँले बनाएको संविधानमा ‘कु’ हुँदैगर्दा त्यसविरुद्ध चुइँक्क बोल्न नसक्ने मेरो अध्यक्षको यो तहको ‘निरिहता’ देख्दा दया लागेको छ ।’
उनले संविधानमा प्रतिनिधिसभा विघटनको यस्तो अवस्थाको परिकल्पना नगरिएको भन्दै उनले संविधानका अक्षर त्यसको स्पन्दन अनि त्यससँग जोडिएका सन्दर्भ र त्यस समयका सभा, समिति अनि कोठादेखि चोटासम्मका बहसको बारेमा नेम्वाङलाई जानकारी रहेको थापाले उल्लेख गरेका छन् ।
उनले संविधान बनाएको संविधान सभाको नेताले संविधानको पक्षमा उभिने साहस गर्न नसकेको भन्दै संविधानको व्याख्या गर्ने जिम्मेवारी पाएको सर्वोच्च अदालतले संविधानको पक्षमा उभिने साहस राख्ने विश्वास व्यक्त गरेका छन् ।
