१ माघ, सप्तरी ।
सप्तरीमा चार दिन देखी अत्यधिक जाडो बढेको छ । बिहानै देखी बाक्लो हुस्सु र चिसो हावा चल्दा अत्यधिक जाडो बढेको हो । जाडो बढेपछि जनजीवन कष्टकर बनेको स्थानीयले बताएका छन् । चार दिनअघि सम्म बिहान र बेलुका चिसो भए पनि दिउँसो घाम लाग्ने गरेकोमा चार दिनयता घाम लाग्न छाडेपछि अत्यधिक चिसोले जनजीवन कष्टकर बनेको स्थानीयले बताएका छन् ।
चिसो बढेसँगै न्यानो सिरक र न्यानो लुगाको कारोबार पनि ह्वात्तै बढेको सम्बद्ध व्यवसायीहरूले बताएका छन् । चिसोले बढी मात्रामा बालबालिका र वृद्धवृद्धाहरु बढी प्रभावित हुन थालेका छन् । बिहानै देखी चल्ने शितलहर र हुस्सुका कारण घरबाट अत्यावश्यक काम भए मात्र मानिस बाहिर निस्कने गरेका छन् । चिसोका कारण स्थानीय गजेन्द्र नारायण सिंह अस्पतालमा निमोनिया, कोल्डडायरिया, रुघाखोकीका बिरामीको चाप बढेको अस्पतालका प्रमुख डा. रन्जित झाले बताए ।
यता शितलहरले गहुँ, टमाटर, आलु प्याज, लहसुन लगायतका तरकारी बालीमा पनि प्रत्यक्ष असर पारेको कृषक सत्यनारायण यादवले बताए।सप्तरीको छिन्नमस्ता गाउँपालिका ३ निवासी यादवले केही दिनयता निरन्तरको सितलहरले खेतमा लगाइएको आलु, टमाटर, प्याज, लहसुन र गहुँ खेतीलाई क्षति पु¥याएका बताए। अर्का कृषक अजित झाले सितलहरले विभिन्न तरकारी खेतीको उत्पादकत्वमा समेत कमी आएको सुनाए । यता मौसमविदहरुले चिसोको प्रभाव अझ केही दिन देखिने भन्दै आवश्यक सतर्कता अपनाउन सुझाव दिएका छन् ।
