९ फागुन, जनकपुरधाम ।
धनुषा प्रहरीले बालकलाई अपहरण गरेर १ करोड फिरौती रकम माग्ने अपहरणकारीलाई पक्राउ गरी आज सार्वजनिक गरेको छ । जिल्ला प्रहरी कार्यालय धनुषाले नगराइन नगरपालिका वडा नंं ६ बस्ने रमेश दासको छोरा वर्ष ७ को चन्दन दासलाई अपहरण गरेर १ करोड फिरौती रकम माग गर्ने वर्ष २० को रामरतन दास भन्ने लक्ष्मेश्वर दासलाई पक्राउ गरी आज सार्वजनिक गरेको हो ।
बालकलाई शनिबार दिउँसो १ः०० बजे घरबाट अपहरण गरेर महोत्तरी जिल्लाको पिपरा गाउँपालिका वडा नं ७ दनौली घर भई जनकपुरधाम उपमहानगरपालिकाको वडा नंं ७ कटैया चौरीमा डेरा गरी बस्ने दासले डेरामा नै बन्धक बनाएर बालकलाई राखेको अवस्थामा प्रहरीले उद्धार गरी परिवारको जिम्मा लगाइएको जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटले जानकारी दिए ।
बालकलाई अपहरण गरेर साँझ ५ः०० बजे आमालाई फोन गरी १ करोड फिरौती रकम माग गरेपछि पीडितले प्रहरीमा खबर गरेपछि जिल्ला प्रहरी कार्यालय तथा प्रदेश प्रहरी कार्यालयको विशेष टोली परिचालन गरी गए राति ८ः३० बजे बालकलाई सकुशल उद्धार गरिएको प्रहरीले जनाएको छ ।
कपडा तथा हाडवेयरको व्यवसाय गर्ने बालकका बुबासँग १ करोड रकम माग गरेपछि सीमा प्रहरी कार्यालय जटहीमा खबर गरेका थिए । प्रहरीले तत्कालै विशेष टोली परिचालन गरेर अपहरणकारीलाई पक्राउ गर्नमा सफल भएको छ ।
यस अघि अनुसन्धानको क्रममा बालकलाई अपहरण गरिराखेको घरका धनीलाई प्रहरीले पक्राउ गरेको थियो । अपहरण गर्ने युवक दास बालकका आफ्नै मामा रहेको र अपहरण गरेको पनि उनले स्वीकार गरेको प्रहरीले जनाएको छ ।
नीज अपहरणकारी माथि अपहरण तथा शरीर बन्धक सम्बन्धी कानुन अनुसार प्रहरीले मुद्दा चलाउने तयारी गरेको प्रहरी उपरीक्षक रानाभाटले जानकारी दिए ।
