२९ फागुन, एजेन्सी।
सन् २०२२ को अन्त्य सम्ममा एसियामा कोरोना भाइरस विरुद्धको १ अर्ब डोज खोप उपलब्ध गराउन अमेरिका, अस्ट्रेलिया, भारत र जापानका नेताहरु सहमत भएका छन् । सन् २००७ मा गठन गरिएको क्वाद नामक समूहले पहिलोपटक आयोजना गरेको नेताहरुको भर्चुअल बैठकमा सो समूहमा आवद्ध मुलुकका नेताहरुले संयुक्त रुपमा प्रतिवद्धता जनाएका हुन् ।
जोनसन एण्ड जोनसनले उत्पादन गरेको कोरोना विरुद्धको खोप एकै डोज भए पुग्ने भएकाले सो खोप भारतमा उत्पादन गर्ने योजना बनाइएको छ । बैठकमा अमेरिकाले शुरुको अवस्थामा दक्षिण पूर्वी एसियामा खोपको मात्रा पुर्याउनु पर्नेमा जोड दिएको छ ।
भारतको उत्पादन, अमेरिकी प्रविधि, जापान र अमेरिकाको आर्थिक सहयोग र अस्ट्रेलियाकाको आपूर्ति प्रबन्धले तोकिएकै अवधिमा १ अर्व डोज खोप उपलब्ध गराउन सकिने अमेरिकी राष्ट्रिय सुरक्षा सल्लाहकार जेक सुलिभानले भर्चुअल बैठकमा बताएका हुन् । खोप दक्षिण पूर्वी एसियाली मुलुकको संगठन आसियान साथै प्रशान्त र अन्य स्थानमा पनि पुर्याइने जनाइएको छ ।
