३१ चैत्र, लहान ।
डाकाको समूहले लहान– ७ स्थित राजेश सारडाको घरबाट लुटेर लगेको बा १० च ९३०२ नम्बरको जिप र सुनचाँदी फेला परेको छ ।
सोमबार बेलुकी साढे ७ बजेतिर आएको हतियारधारी डाकाको समूहले सारडाका पिता भगिरथ सारडा र श्रीमतीको कन्चटमा पेस्तोल तेर्स्याएर सुनचाँदी र जिप लुटेर लगेका थिए ।
खोजतलास गर्दै जाँदा सिरहाको कल्याणपुर नगरपालिका– १२ बेल्हामा बेवारिसे अवस्थामा जिप र लुटिएको भनिएको सुनचाँदी भेटिएको इलाका प्रहरी कार्यालय लहानका डीसपी डा. तपन दहालले बताए ।
जिपसहित त्यसभित्र परिवारजनले भनेअनुसारका सबै सुनचाँदी भेटिएको उनले बताए । हामीले सबै सामान यकिन गराएका छौँ, लगभग सबै भेटिएको छ, उनले भने, केही तलमाथि हुनसक्छ, हामी परिवारजनसँग फेरि यकिन गराउँछौँ ।
डाकाहरुको भने सुराक पत्ता लागेको छैन । उनीहरू गाडी अप्ठ्यारो ठाउँमा छोडेर भागेको र खोजबिन भइरहेको डीएसपी दाहालले जनाए ।
