१ वैशाख, प्यूठान । प्यूठान जिल्लाको स्वर्गद्वारीनजिकै भएको सवारी दुर्घटनामा जिल्ला प्रशासन कार्यालय गुल्मीका प्रशासकीय अधिकृतसहित पाँच जनाको मृत्यु भएको छ ।
दुई जनाको घटनास्थलमै र तीन जनाको उपचारका क्रममा अस्पतालमा मृत्यु भएको भिंग्री प्रहरी चौकीले जनाएको छ । मृत्यु हुनेमा सवारी चालक पनि छन् । जिल्ला प्रशासन कार्यालय गुल्मीका १४ जना कर्मचारी स्वर्गद्वारी दर्शनका लागि लु १ ज १६ सय ५५ नम्बरको सार्वजनिक जिपमा गएका थिए । सो क्रममा जिप प्यूठानको स्वर्गद्वारी नगरपालिका–४ रुमाले भन्ने स्थानमा जिप दुर्घटनामा परेको हो । सडकबाट झण्डै १ सय मिटर तल जिप खसेको थियो । जिल्ला प्रशासन कार्यालयका कम्प्युटर अपरेटर सूर्य पन्थी र मुद्दा शाखाका ईश्वर भण्डारीको घटनास्थलमै मृत्यु भएको हो भने प्रशासकीय अधिकृत श्याम न्यौपाने, प्रशासनकै खरिदार यमलाल पन्थी र जिप चालक केशव कार्कीको उपचारका क्रममा भिंग्री प्राथमिक स्वास्थ्य केन्द्रमा मृत्यु भएको हो । घटनामा जिपमा सवार अरु घाइते भएका छन् ।
