१२ साउन, काठमाडौँ ।
नेपाली कांग्रेसका सांसद् गगन थापाले पुनःस्थापित संसद्ले सरकारलाई विश्वासको मत दिएसँगै नयाँ अध्याय प्रारम्भ भएको बताएका छन्। , प्रतिनिधि सभाको मंगलबारको बैठकको शून्य समयमा बोल्दै उनले यो अध्यायको सुखान्तको लागि सरकार र सांसद दुवैसँग नयाँ अपेक्षाहरु रहेको बताए।
उनले भने– ‘संसद्लाई हेप्ने, अदालतलाई हप्काउने। न विधि मान्ने, न विज्ञानलाई पत्याउने। स्थानीय र प्रदेश सरकारलाई पंगु बनाउने। जनताको दुहाइ दिने, तर आसेपासे पोस्ने। बाहिर सिंह जस्तो गर्जने, भित्र लम्पसार पर्ने। यस्तै यस्तै परिचय बनाएर बालुवाटारबाट बार्दली पुगेको छ अघिल्लो सरकार। नयाँ सरकारलाई यस्तो कुनै पनि अपराध गर्ने छुट छैन ।’
उनले संसद् सरकारसँग डराउने नभई सरकार यो संसद्सँग डराउनुपर्ने बताए । उनले भने–‘न त यो संसद्लाई बेवास्ता गर्न दिइने छ। न त कामविहीन बनाउन। न त मनोमानी ढंगले स्थगित गर्न दिइने छ। न त छल्न। यो संसद् सरकारसँग डराउने होइन, सरकार यो संसद्सँग डराउनुपर्ने छ, सांसद्को प्रश्नसँग, सरकारको निगरानीसँग। परीक्षा प्रधानमन्त्रीको मात्रै होइन, सभामुखको पनि छ। यो संसद् जोगाउन लाग्ने हामी प्रत्येक सांसद्को छ ।’
थापाले संविधानको धाराले प्रतिनिधि सभा र सांसद्को अधिकारले सरकार पुनःस्थापित भएको भन्दै अब सभामुख र सांसद्को कर्मले संसद् र संविधानप्रति गुमेको जनविश्वासलाई पुनःस्थापित गर्नुपर्ने बताए।
