१७ साउन, काठमाडौं ।
प्रमुख प्रतिपक्षी दल नेकपा (एमाले) को स्थायी कमिटी बैठक शुरु भएको छ । पार्टी कार्यालय सचिव शेरबहादुर तामाङका अनुसार तुलसीलाल स्मृति प्रतिष्ठान च्यासल ललितपुरमा बैठक ३ः३० बजे शुरु भएको हो ।
आजको बैठकमा पनि नेता माधवकुमार नेपाल पक्षका सदस्यहरु अनुपस्थित रहेको पनि उनले बताए । बैठकका लागि एमालेले मुख्य तीन वटा कार्यसूची तय गरेको छ । केन्द्रीय विभागलाई पूर्णता दिने, विधान महाधिवेशनको तयारी र पार्टी सदस्यता नविकरण तथा वितरण रहेको छ । पार्टी कार्यालय सचिव तामाङका अनुसार साउन २५ गते विधान महाधिवेशन गर्ने निर्णय यसअघिको बैठकले तय गरिसकेकाले त्यसको तयारीका लागि विभिन्न उपसमिति गठन हुनेछन् ।
त्यस्तै, बैठकमा विघटित कार्यदलका सदस्यहरुले आज पनि बैठकको प्रगतिबारेमा जानकारी गराउने कार्यक्रम छ । आज बिहानदेखि कार्यदलका सदस्यहरु अनौपचारिक संवादमा रहेका थियो । नेता नेपाल पक्षका कार्यदलका सदस्यहरु आजको बैठकमा सहभागी नभए पनि अर्को बैठकदेखि सहभागी हुने विश्वास एमालेले लिएको छ ।
अध्यक्ष केपी शर्मा ओलीको अध्यक्षतामा भइरहेको बैठकले अब नेता नेपाललाई सहमतिका लागि थप समय निर्धारण गर्ने कि पार्टी गतिविधि अगाडि बढाउने विषयमा पनि आज निर्णय हुने तामाङले बताए ।
