७ भदौ, काठमाडौँ ।
कडा कानून र कार्यान्वयनका लागि चिनिएका मुलुक मध्येको एक साउदी अरेवियामा गएको एक हप्ता मात्रै त्यहाँको कानून उल्लंघन गर्ने १६ हजार आप्रवासी पक्राउ परेका छन् । आवासीय, श्रम र सीमा सुरक्षा सम्बन्धी कानुन उल्लंघन गर्नेहरुलाई पक्राउ गरेको त्यहाँको आन्तरिक मन्त्रालयलाई उद्धृत गर्दै अन्तराष्ट्रिय सञ्चारमाध्यमहरुले जनाएका छन् ।
पक्राउ परेकाहरुमा आवासीय कानून उल्लंघन गरेका पाँच हजार चार सय ३६ जना , नौ हजार ७५ सीमा सुरक्षा उल्लंघन गर्ने र श्रम कानून उल्लङ्घन गर्ने एक हजार तीन सय ८९ जना रहेका छन् । अहिलेसम्म साउदीमा यस्ता कानुन उल्लंघन गर्ने ७८ हजारभन्दा बढीमाथि कानुनी कारबाही चलिरहेको स्थानीय संचार माध्यामले जनाएका छन् ।
जसमध्ये ६५ हजार बढी पुरुष र १३ हजार बढी महिला रहेका छन् । यस्तै ५८ हजार तीन सय उल्लङ्घनकर्तालाई कूटनीतिक प्रक्रियामार्फत स्वदेश फिर्तीको लागि पहल भइरहेको र आठ हजार एक सय २८ जनालाई देश निकाला गरिएको त्यहाँको आन्तरिक मन्त्रालयले जनाइएको छ ।
त्यहाँको नियम अनुसार यस्तो अपराधमा संलग्न हुनेलाई १५ वर्ष जेल सजाय र दश लाख साउदी रियाल बराबरको जरिवाना तोकिएको छ । यस्तो सजाय पाउने आप्रवासीमा नेपाली कति सख्यामा छन् भन्ने विषय भने खुलिसकेको छैन् ।
