८ भदौ, काठमाडौँ ।
इंग्लिस प्रिमियर लिगमा वेस्ट ह्यामले सानदार जित निकालेको छ । गएराति भएको खेलमा वेस्टह्यामले १० खेलाडीमा समेटिएको लेस्टर सिटीमाथि ४–१को फराकिलो जित निकालेको हो ।
खेलको २६औं मिनेटमा पाब्लो फोर्नाल्सको गोलबाट वेस्ट ह्यामले सुरुवाती अग्रता लिएको थियो । ४०औं मिनेटमा एयोजी पेरेज सिधै रातो कार्ड खाँदै मैदानबाट बाहिरिएपछि लेस्टर १० खेलाडीमा समेटियो । त्यसको फाइदा उठाउँदै ५६औं मिनेटमा सेड बेनरहमाले गोल गर्दै वेस्ट ह्यामको अग्रता दोब्बर पारे ।
६९औं मिनेटमा लेस्टरका युरी टिलेमान्सले गोल गर्दै खेललाई २–१ को अवस्थामा ल्याए तर, मिचेल एन्टेनियोले ८०औं मिनेटमा पहिलो र ८४औं मिनेटमा व्यक्तिगत दोस्रो गोल गर्दै वेस्ट ह्यामलाई ४–१को सानदार जित दिलाए ।
जितसँगै वेस्ट ह्याम २ खेलबाट ६ अंक जोडेर शीर्षस्थानमा उक्लिएको छ । पराजित लेस्टरको भने २ खेलमा ३ अंक छ ।
