११ भदौ, एजेन्सी ।
अफगानिस्तानका क्रिकेटर रासिद खानले विश्व समुदायसँग अफगानिस्तानको हिंसा अन्त्यको लागि आग्रह गरेका छन् । उनले बिहीबार काबुल विमानस्थलमा भएको बम विष्फोटको घटनालाई लक्षित गर्दै यस्तो आग्रह गरेका हुन्
सामाजिक सञ्जाल ट्वीटरमार्फत उनले भनेका छन्- अहिले पुनः काबुलमा रगत बगिरहेको छ । कृपया, अफगानीलाई मार्न बन्द गर ।’
बिहीबार विमानस्थलमा भएको उक्त आक्रमणमा परी अहिलेसम्म ९० जनाको मृत्यु भएको छ । जसमध्ये १३ जना अमेरिकी सैनिक छन् । तालिबानले यो आक्रमण अमेरिकी सेनाको नियन्त्रणमा रहेको स्थानमा भएको बताएको छ ।
यसअघि रासिद खानले अगष्ट १० मा विश्व समुदायलाई अफगानिस्तानलाई समस्यामा छाड्न नजान आग्रह गर्दै ट्वीट गरेका थिए । उनले अफगानिस्तानमा प्रत्येक दिन निर्दोष मानिस, बालबालिका र महिला मारिइरहेको, घर र सम्पत्तिहरु ध्वस्त भइरहेको भन्दै उनले यो अवस्थामा अफगानिस्तानलाई नछाड्न उनले विशव समुदायलाई अपिल गरेका थिए । आफूहरुले शान्ति चाहेको उनको भनाइ थियो ।
तालिबानले अफगानिस्तानलाई आफ्नो नियन्त्रणमा लिएसँगै आगाम महिना तय गरिएको अफगानिस्तान र पाकिस्तानबीचको एकदिवसीय क्रिकेट अर्को वर्षसम्मका लागि स्थगित गरिएको छ । तालिबानले महिला खेलकूद के हुन्छ भन्ने स्पष्ट नपारेपनि पुरुष क्रिकेट टोलीमा कुनै किसिमको हस्तक्षेप नगर्ने बताएको छ ।
