१९ भदाै, एजेन्सी ।
केही दिन यता विश्व फुटबल जगतमा सर्वाधिक चर्चामा रहेका पोर्चुगिज कप्तान क्रिष्टियानो रोनाल्डोको नाम गिनिज बुक अफ वल्ड रेकर्डमा समावेश भएको छ । अन्तर्राष्ट्रिय फुटबलमा सर्वाधिक गोल गर्ने कीर्तिमान बनाएपछि रोनाल्डोलाई गिनिज बुक अफ वल्ड रेकर्ड संस्थाले त्यसको प्रमाणपत्र प्रदान गरेको हो ।
गिनिज बुकमा नाम दर्ता भएपछि रोनाल्डोले पनि गिनिज बुक अफ वल्ड रेकर्डलाई धन्यवाद ज्ञापन गर्दै आफ्नो गोलसंख्या अझै बढाउने बताएका छन् । रोनाल्डोले बुधबार युरोपेली क्षेत्रको विश्वकप छनोट अन्तर्गत समूह ‘ए’ को खेलमा रिपब्लिक अफ आयरल्याण्डबिरुद्ध दुई गोल गर्दै विश्व फुटबलको इतिहासमा सबैभन्दा बढी गोल कीर्तिमान बनाएका थिए ।
पाँच पटकको बालोन डि ओर विजेता रोनाल्डोले सन् २००३ देखि हालसम्म १ सय ८०औं खेलमा १ सय ११ गोलको कीर्तिमान हासिल गरेका हुन् । रोनाल्डोले यस क्रममा ४४ राष्ट्रविरुद्ध गोल गरेका छन् । उनले इरानका अली दाईले १९९३ देखि २००६ को अवधिमा १ सय ४९ खेलमा १ सय ९ गोल गर्दै राखेको कीर्तिमानलाई भंग गर्दै आफ्नो नाममा लेखाएका हुन् ।
रोनाल्डोले गत जुलाईमा सम्पन्न युरोपेली च्याम्पियनसिपमा समूह चरणको अन्तिम खेलमा फ्रान्सविरुद्ध दुई गोल गर्दै अली दाईको कीर्तिमानलाई बराबरी गरेका थिए । ३६ वर्षीय रोनाल्डोले दुई राष्ट्र लिथुआनिया र स्वीडेनविरुद्ध सबैभन्दा धेरै ७ गोल गरेका छन् । उनले पछिल्ला ६ वर्षमा मात्रै ५६ गोल गरेका छन् । गिनीज बुकमा पेले ,मेस्सी, बुफन,रामोस,पिटर ,केभिन, एमबाप्पे लगायत ३२ भन्दा बढी फुटबलरहरुले कीर्तिमानी नाम लेखाईसकेका छन् ।
