५ असोज, काठमाडौं ।
अमेरिका जान नेपालबाट हिँडेका ८५ नेपाली जर्मनीको फ्र्याङफर्ट विमानस्थलमा अलपत्र परेका छन्।
नेपालबाट दुबई– मस्को– जर्मनी हुँदै मेक्सिकोको बाटोबाट अमेरिका जान हिँडेका उनीहरु आफूसँग भएका कागजात नक्कली भएका कारण जर्मनीमै रोकिएका हुन्।
फ्र्याङफर्ट विमानस्थलको सुरक्षामा कार्यरत एक नेपालीकाअनुसार ८५ जनामध्ये ३५ जनालाई जर्मनीबाट जान दिइएको छैन भने बाँकी मेक्सिकोबाट फर्किएका हुन्। तीमध्ये अनुसन्धानका लागि १८ जनालाई प्रहरीले लगेको उनी बताउँछन्।
‘मैले अघिल्लो हप्ता अनुवादक भएर कुरा गर्दा ८५ जना थिए, ‘तीमध्ये ३५ जना जर्मनीमै रोकिएका हुन्, बाँकी मेक्सिकोबाट फर्किएका हुन्। उनीहरु जर्मनीबाट मेक्सिको हुँदै अमेरिका जानलाई हिँडेका रहेछन्।’
विमानस्थलमा अलपत्र परेकाहरुमध्ये धेरै रोल्पा, रुकुम, दाङ, म्याग्दीसहित पश्चिम नेपालका रहेको उनी बताउँछन्। तीमध्ये ३ जना महिला रहेको उनले बताए। हाल उनीहरु विमानस्थलको ट्रान्जिटमा रहेको उनले बताए।
‘मेक्सिकोबाट अमेरिका जानका लागि नेपालमा दलाललाई ४० लाख दिएर आएकाहरु छन्,’ उनी भन्छन्, ‘यहाँ प्रहरीले केहीलाई अनुसन्धानका लागि सोधपुछ गरेको छ भने केही ट्रान्जिटमा छन्।’
विमानस्थलमा अलपत्र परेकामध्ये ६ जनासँग जापानको नक्कली भिसा रहेको छ। उनीहरुलाई नेपालबाट दुबई हुँदै पाकिस्तानी दलालले त्यहाँसम्म पु¥याएको प्रारम्भिक कुराकानीमा खुलेको उनले बताए।
विमानस्थलमा अलपत्र परेकाहरुबारे जर्मनीस्थित दूतावासलाई जानकारी भएपनि आधिकारिक निवेदन नआउँदासम्म केही गर्न नसकिने दूतावासले जनाएको छ।
जर्मनका लागि नेपाली राजदूत रामकाजी खड्काका अनुसार विमानस्थलमा अलपत्र परेकाहरुबारे दूतावासलाई समाचारमार्फत् थाहा भएको तर, आधिकारिक निवेदन नआउँदा कहाँबाट कति जना आएका छन्, त्यहाँ कसरी पुगे भन्ने बारेमा जानकारी हुन सकेको छैन।
उनले भने, ‘नामावली, ठेगानासहित हामीले निवेदन दिनलाई भनेका छौं। आधिकारिक निवेदन आएपछि मात्रै हामीले प्रक्रिया अघि चाल्न सक्छौं।’ अलपत्र परेका नेपालीहरुलाई एयलाइन्सले नै समन्वय गरेर नेपाल फर्काउनुपर्ने उनले बताए।
यता मानव बेचबिखन अनुसन्धान ब्युरो प्रमुख, एसएसपी दुर्गा सिहंका अनुसार आधिकारिक रुपमा अलपत्र परेकाहरु बारे कुनै उजुरी आएको छैन। आफूले पनि सञ्चारमाध्यममार्फत् जानकारी पाएकाले त्यसबारे थप बुझ्न हेडक्वार्टरलाई जानकारी दिएको र उजुरी आएमा प्रक्रिया अघि बढ्ने उनले बताइन्। ‘हामीले यसबारे बुझ्न सम्बन्धित निकायलाई भनेका छौं। समाचारबाटै थाहा भएको हो। दूतावासमार्फत् समन्वय गर्न भनेका छौं’ उनले भनिन्।
हालसम्म कुनै पनि आधिकारिक उजुरी नआएको सिंहले बताइन्।
