७ असाेज, बैतडी ।
बैतडीको सुर्नया गाउँपालिका–४ स्थित शनसेरी माण्डौँका व्यापारी मृत्यु प्रकरणमा दुई जना पक्राउ परेका छन् ।
सुर्नया–४ लेकडाँडा निवासी ५६ वर्षका कमल सिंह महराकाे हत्या आशंकामा दुई जनालाई पक्राउ गरेको हो । पक्राउ परेका व्यक्तिहरूको परिचय प्रहरीले खुलाएको छैन ।
महरा आज बिहान मृत अवस्थामा भेटिएका थिए । मृतक महराको शरीरभरि चोटपटक र नीलडामका साथै टाउको र छातीमा गम्भीर चोट रहेकाले उनको हत्या भएको आशङ्का गरिएको छ ।
मासु पसल सञ्चालन गर्दै आएका मृतक महराको आफ्नो पसल बन्द रहेको पाइएको छ भने, उनको शव दुई सय मिटर टाढाराम महरा र हिक्मत महराको पसल अगाडी भेटिएको थियो ।
शव भेटिएको ठाउँका पसलेले आफूलाई घटनाबारे जानकारी नभएको बताए पनि पसलभित्रै रगत भेटिएको स्थानीय प्रताप महराले बताए।
मृतक महरालाई राती १० बजे घरबाट बुहारीले फोन गर्दा घर आउन ढिलो हुने र आफ्ना लागि खाना छोपेर राखिदिन भनेका थिए । मृतकको खल्तीमा केही नगद पैसा र १ पाउ जति पकाएको मासु समेत भेटिएको छ ।
मृतक महराको घरमा श्रीमती, दुई छोरा, एक जना बुहारी र दुई जना नातिनी छन् । मृतकको शव पोष्टमार्टका लागि जिल्ला अस्पताल बैतडी ल्याउने तयारी भइरहेको प्रहरीले जनाएको छ ।
