१३ असाेज, काठमाडौं ।
एभरेष्ट प्रिमियर लिग (इपिएल) अन्तर्गत बुधबारको दोस्रो खेलमा भैरहवा ग्ल्याडीयटर्सले विराटनगर वारीयर्सलाई ६ विकेटले पराजित गरेको छ ।
टियु मैदानमा विराटनगरले प्रस्तुत गरेको ९० रनको लक्ष्य भैरहवाले १५.३ ओभरमा ४ विकेट गुमाउँदै पूरा गर्याे। जितसँगै भैरहवा अंक तालिकाको शीर्ष स्थानमा उक्लिएको छ ।
भैरहवाको जितमा उपुल थरांगाले सर्वाधिक ३४ रनको योगदान दिए । उनले ३५ बलमा ४ चौका प्रहार गरे । कप्तान शरद भेषावकर ६ रनमा नटआउट रहे ।
भैरहवाका लागि ओपनर प्रदीप ऐरीले २३ बलमा ३ चौकासहित २२ रनको योगदान दिए । उनी पाँचौ ओभरमा करण केसीको बलमा सिकन्दर राजाबाट समातिए । पहिलो विकेटका लागि २७ रनको साझेदारी अन्त्य भएपछि आठौं ओभरमा अर्का ओपनर तमिम इकबाल रामनरेश गिरीको बलमा आउट भए । उनले १३ बलमा १ चौका र १ छक्काको मदतले १२ रन जोडे ।
११ औं ओभरको अन्तिम बलमा रोहित पौडेल रामनरेशकै शिकार बने । ठूलो सट खेल्ने धुनमा उनी चन्द्रपाल हेमराजको हातबाट थर्डमा समातिए । उनले १० बलमा २ चौकको मदतले १२ रन जोडे । लगत्तै अर्को ओभरमा आरिफ शेख वसन्त रेग्मीको बलमा खाता नखोली आउट हुँदा भैरहवा ७०-४ को स्थितिमा पुगेको थियो ।
त्यसपछि शरद र उपुलले टोलीलाई जितसम्म पुर्याएका थिए । विराटनगरका लागि रामनरेशले २ विकेट लिँदा वसन्त र करणले १-१ विकेट हात पारे ।
त्यसअघि टस हारेर ब्याटिङको निम्तो पाएको विराटनगर १७.४ ओभरमा ८९ रनमा अल आउट भयो । विराटनगरका ब्याटर दीलशान मुनाविराले सर्वाधिक २५ रन बनाए । पहिलो ओभरको चौथो बलमा धाम्मिका प्रसादले ओपनर हेमराज चन्द्रपाउललाई विकेटकिपर उपुल थरंगाबाट शून्यमा क्याच आउट गराए ।
बायाँ हाते तीव्र गतिका बलर दुर्गेश गुप्ताले छैटौं ओभरको तेस्रो बलमा ओपनर आसिफ शेखलाई ११ रनमा बोल्ड आउट गरे । आसिफ अघि बढेर सट खेल्नेक्रममा मिस हुँदा बोल्ड हुन पुगेका थिए । आरिफको आठौं ओभरको अन्तिम बलमा ठूलो सट खेलेका अनिलकुमार शाह वैकल्पिक फिल्डर भुवन कार्कीबाट ११ रनमा समातिन पुगे ।
आरिफ शेखको दशौं ओभरको अन्तिम बलमा दीलशान २५ रनमा अभिनाष बोहराबाट क्याच आउट भए । उनले २० बलमा २ चौका र १ छक्का प्रहार गरे । कृष्ण कार्कीले कप्तान करण केसीलाई शून्यमा क्याच आउट गराए ।
आरिफको १२ औं ओभरको चौथो बलमा सिकन्दर राजा लङअनमा अभिनाषबाट ५ रनमा क्याच आउट भएपछि विराटनगर ६६–६ को अवस्थामा पुगेको थियो । अभिनाषको बलमा सौरभ खनाल ३ रनमा क्याच आउट भएका थिए । प्रतिश जि.सी शून्य, सुमित महर्जन १३ र वसन्त रेग्मी १० रन बनाए ।
भैरहवामा मध्यगतिका बलर आरिफ शेखले ३ ओभरमा २३ रन खर्चेर ३ विकेट लिए । धाम्मिका प्रसादले ३ ओभरमा १ मेडन सहित ६ रन खर्चेर विकेट लिए । अभिनाष बोहराले ३.४ ओभरमा २३ रन खर्चेर २ विकेट लिए । दुर्गेश गुप्ता र कृष्ण कार्कीको नाममा १–१ विकेट रह्यो ।
लगातार दोस्रो हार बेहोरेको विराटनगर भने अंकविहिन छ ।
