२५ असाेज, विराटनगर।
मोरङको धनपालथान गाउँपालिकास्थित कर्सिया बजारमा भारतीय लुटेराको समूहले सिटिजन बैंक लुट्ने प्रयास गरेकाे छ । तर, उनीहरुको प्रयास भने असफल भएको प्रहरीले जनाएको छ।
स्थानीयका अनुसार दिउँसो करिब ४ बजेको समयमा पाँचजनाको समूहमा आएका लुटेरा समूहले बैंकका सुरक्षा गार्डमाथि गोली चलाएर बैंकमा लुटपाटकाे प्रयास गरेका थिए ।
लुट्न आएको समूहलाई सुरक्षागार्डले रोक्न खोजेका थिए। उनीहरु गार्डमाथि गोली प्रहार गरेर लुटपाट गर्न भित्र छिरेका थिए। गोली चलेपछि स्थानीय प्रहरी बैंकमा पुगेको थियो। प्रहरी पुगेपछि लुटेराहरु गोली चलाउँदै भागेका थिए। भाग्ने क्रममा ३ जनालाई नियन्त्रणमा लिइएको प्रदेश १ प्रहरी कार्यालयका प्रवक्ता एसपी नविनराज राईले जानकारी दिए।
लुटेरा समूहको गोली लागेर बैंकका सुरक्षा गार्ड घाइते भएका छन् । उनको गर्धनमा गोली लागेको र अहिले विराटनगरस्थित न्यूरो अस्पतालमा उपचार भइरहेको प्रहरीले जनाएकाे छ। लुटेरा समूहका १ जना पनि गोली लागेर घाइते भएको छन्।
एसपी राईले घटनाको अनुसन्धान भइरहेको जानकारी दिए ।
