२५ असाेज, काठमाडाैँ ।
नेपाली भूभाग अतिक्रमण गरेर नेपालसंगको वर्षौदेखिको सीमा विवाद समाधान गर्न चासो नदेखाएको भारत त्यसको विपरित चीनसंगको सीमा विवादका कारण भने रन्थनिएको छ । भारतले नेपाली भूभाग कब्जा गरेर जति पीडा नेपाललाई दिएको छ यही प्रकृत्तिको पीडा चीनबाट भारतले खेपिरहेको छ ।
भारत र चीनबीच पूर्वी लद्दाखमा एलएसी अर्थात् वास्तविक नियन्त्रण रेखामा रहेको सीमा विवाद समाधान गर्न आइतवार भएको १३ औँ चरणको वरिष्ठ सैन्य कमान्डरको स्तरको वार्ता पनि निष्कर्षविहीन रहेपछि भारत थप चिन्तित देखिएको छ । चीन एलएसीमा यथास्थिति बहाल गर्न तयार नभएको भारतले बताएको छ । अहिले पूर्वी लद्दाखमा एलएसीमा दुई देशबीच हटस्प्रिङ्स, डेपसाङ्गबल्ज र चार्डिङ्ग नुल्लाह जन्क्शनलाई लिएर विवाद छ ।
यो वार्तापछि दुई देशका सेनाको तर्फबाट विज्ञप्ति जारी गरिएको छ । भारतले स्थितिको गलत आँकलन गर्नुको साटो वार्तालाई लक्ष्यसम्म पुर्याउनुपर्ने बताएको छ । भारतीय सेनाले भने चीनसँग रचनात्मक सल्लाह राखिएको तर ऊ मान्नकालागि तयार नभएको बताएको छ । चीनले भने भारतले पूरै मामिलामा अनुचित र अवास्तविक माग राखेको विज्ञप्तिमा जनाएको छ ।
भारतका सेना प्रमुख जनरल मनोज मुकुन्द रनवणेले गएको हप्ता चीनले एलएसी नजिक ठूला पूर्वाधारहरू बनाइरहेको र त्यहाँका सेना दोस्रो हिउँदमा पनि पछि नहट्ने सोचिरहेको आफूलाई लागिरहेको बताएका थिए । नरवणेले यदि चीनपछि नहटे भारत पनि पछि नहट्ने बताएका थिए । उनले बताए जस्तै चीन आफ्नै अडानमा अडिक देखियो ।
चीनको तर्फबाट जारी गरिएको विज्ञप्तिमा भारतले अनुचित र अवास्तविक माग उठाइरहेको र अवस्थाझन् कठिनबनिरहेको देखिएको उल्लेख छ । चीनले भारतलाई कुनै पनिपरिस्थितिको गलत आकलन नगर्न चेतावनीदिएको छ । चीनको पिपुल्स लिबरेशन आर्मी (पीएलए) वेस्टर्न थिएटर कमान्डका प्रवक्ता सिनियर कर्णेल लङ्गशाहोआका अनुसार दुई देशबीचको यो वार्ता मोल्दो–चुशूलमिटिङ प्वाइन्टमा चिनियाँ क्षेत्रमाभएको हो ।
चीनले सीमामा जारी गतिरोध अन्त्यगर्न र तनाव हटाउन धेरै प्रयास गर्यो र दुई देशका सेनाबीच राम्रो सम्बन्ध बनाइ राख्न आफ्नो तर्फबाट पूरै इमान्दारी देखाइयो तर भारतले अवास्तविक माग मात्र उठाइरह्यो भन्दै लङ्गले जारी विज्ञप्तीमा भनेका छन् । यसरी चिनियाँ अधिकारीले सीमाका बारेमा भारतको अडान वा मागलाई नै अनुचित भनिदिएपछि तत्काल लद्याखको विवाद साम्य हुने संकेत देखिदैन ।
