३० असाेज, एजेन्सी ।
चेन्नई सुपर किंग्सले इन्डियन प्रिमियर लिग (आईपीएल) २०२१ को उपाधि जितेको छ । शुक्रबार दुबईमा भएकाे फाइनलमा चेन्नईले कोलकता नाइट राइडर्सलाई २७ रनले पराजित गर्दै चौथो पटक च्याम्पियन बनेको हो । च्याम्पियन चेन्नईले २० करोड भारु र उपविजेता कोलकताले १२ करोड ५० लाख भारु पुरस्कार पाउने छन् ।
जितको लागि १ सय ९३ रनको विजयी लक्ष्य पछ्याएको कोलकताले निर्धारित २० ओभरमा ९ विकेट गुमाउँदै १ सय ६५ रन बनायो । कोलकता ओपनर सुभमन गिलले ४३ बलमा ६ चौका सहित सर्वाधिक ५१ रन बनाए । अर्का ओपनर वेंकटेश ऐरले ३२ बलमा ५ चौका र ३ छक्का सहित ५० रनमा आउट भए ।
कोलकतालाई ओपनर ऐर र गिलले पहिलो विकेटका लागि १०.४ ओभरमा ९१ रनको साझेदारी गर्दै राम्रो सुरुवात दिलाएका थिए । तर त्यसपछि लगातार विकेट गुमाउँदै पराजित हुन पुगेको हो । नितिश राणा शून्य, सुनिल नाराायण २, कप्तान ओईन मोर्गन ४, दीनेश कार्तिक ९ र सकिब अल हसन शून्यमा आउट भए । तल्लोक्रमका शिवम माभीले १३ बलमा १ चौका र २ छक्का सहित २० रन बनाए । लोकी फर्गुसनले १८ रन बनाए ।
चेन्नईका शार्दूल ठाकुरले सर्वाधिक ३ विकेट लिए । रविन्द्र जडेजा र जोश हेजलवुडले २–२ विकेट लिए । डवेन ब्राभो र दीपक चाहरले १-१ विकेट लिए ।
त्यसअघि टस हारेर ब्याटिङको निम्तो पाएको चेन्नईले निर्धारित २० ओभरमा ३ विकेट गुमाउँदै १ सय ९२ रन बनाएको थियो । चेन्नईका ओपनर फाफ डु प्लेसिसले ५९ बलमा ७ चौका र ३ छक्का सहित सर्वाधिक ८६ रनको योगदान दिए । मोईन अली २० बलमा २ चौका र ३ छक्का सहित ३७ रनमा अविजित रहे ।
चेन्नईलाई ओपनर ऋतुराज गायकवाड र डु प्लेसिसले पहिलो विकेटका लागि ८.१ ओभरमा ६१ रनको साझेदारी गर्दै राम्रो सुरुवात दिलाएका थिए । ऋतुराजलाई स्पिनर सुनिल नारायणले शिवम माभीबाट ३२ रनमा क्याच गराउँदै साझेदारी तोडेका थिए । ऋतुराजले २७ बलमा ३ चौका र १ छक्का प्रहार गरे ।
त्यसपछि क्रिजमा आएका अनुभवी ब्याटर रोबिन उथप्पाले १५ बलमा ३ छक्का सहित ३१ रन जोड्दै आउट भएका थिए । उनी नारायणको बलमा एलबीडब्लू आउट भएका थिए । तेस्रो विकेटका लागि मोईन अली र फाफ डु प्लेसिसले ६८ रनको साझेदारी गदै विशाल योगफलमा पुर्याएका थिए । डु प्लेसिस अन्तिम बलमा क्याच आउट भएका थिए । कोलकता स्पिनर सुनिल नारायणले ४ ओभरमा २६ रन खर्चेर २ विकेट लिए । शिवम माभीले १ विकेट लिए ।
यसअघि चेन्नईले २०१० मा मुम्बई इन्डियन्सलाई २२ रनले पराजित गर्दै पहिलो पटक च्याम्पियन बनेको थियो । २०११ मा चेन्नईले बेंगलोरलाई ५८ रनले पराजित गर्दै लगातार उपाधि जितेको थियो । २०१८ मा हैदराबादलाई ८ विकेटले पराजित गर्दै चेन्नई तेस्रो पटक च्याम्पियन बनेको थियो । चेन्नई २००८, २०१२, २०१३, २०१५ र २०१९ मा उपविजेता बनेको थियो ।
