६ कात्तिक, विराटनगर ।
शिल्पी थिएटरले मुक्त रंगमञ्च अभियान सुरु गरेको छ । शुक्रबार विराटनगरमा ‘ठूला माछा–साना माछा’ नाटक मञ्चन गरेर शिल्पीले सो अभियानको सुरु गरेको हो ।
सो नाटक प्रदेश–१ का मोरङ, सुनसरी र झापाका २१ स्थानमा मञ्चन गर्ने शिल्पीले जनाएको छ । विराटनगरबाट सुरु भएको नाटक रंगेली, विराटचोक, इटहरी, धरान, इनरुवा, दमक, विर्तामोड, काँकडभिट्टा लगायतका स्थानमा मञ्चन गरिने नाटकका परिकल्पनाकार समेत रहेका निर्देशक घिमिरे युवराजले जानकारी दिए ।
नाटकले राजनीतिक नेतृत्व र कर्मचारीले सर्वसाधारणलाई कसरी दुःख दिएका छन् भन्ने विषयलाई सशक्त रुपमा उठान गरेको छ । त्यस्तै स्थानीय तहमा विकासका नाममा भइरहेका मनपरी र आर्थिक अनियमितालाई पनि नाटकले देखाउने प्रयास गरेको छ । किसान, मजदुरहरुले सरकार, ठेकेदार र विचौलियाबाट कतिसम्म दुःख पाएका छन् भन्ने विषयलाई नाटकले छर्लङ्ग पारेको छ ।
घिमिरे युवराजको परिकल्पना र निर्देशनमा मञ्चन भएको नाटकमा पवित्रा खड्का, रेनुका कार्की ढोली, सविन कट्टेल, संगता उराँव, मानहाङ लावती, असिम खनाल, ज्योति पोखरेल, रविन परियार, गोविन्दओली, ज्याक बराल, हिमाल भुजेल र संजितथुलुङ राईले अभिनयन गर्नेछन् । दर्शकका रुपमा नेपाली कांग्रेसका नेता डा. शेखर कोइरालासहित विभिन्न राजनैतिक दलका नेता, साहित्यकार, पत्रकार, बुद्धिजीवी लगायतको सहभागिता थियो ।
शिल्पीले मञ्चन भएको नाटकलाई आधार मानेर लेखेका उत्कृष्ट ४ कवितालाई जनही २५ हजारका नगदसहित पुरस्कृत गरिने निर्देशक घिमिरेले जानकारी दिए । उनका अनुसार ‘ठूला माछा–साना माछा’ देशभर मञ्चन गरिने र त्यसपछि प्राप्त भएका कवितालाई पुरस्कृत गरिनेछ ।
वि.सं. २०६३ सालमा स्थापित शिल्पीले तीन महिने अभिनय तालिम समेत सञ्चालन गर्दै आएको छ । राष्ट्रिय र अन्तरराष्ट्रिय स्तरमा समेत बेला–बेला विभिन्न नाटक मञ्चन गर्दै आएको शिल्पीले गाउँमा रंगमञ्च कार्यक्रम सञ्चालन गर्ने गरेको छ ।
