१७ कार्तिक, काठमाडौं ।
लगातार चौथो खेलमा जित निकाल्दै पाकिस्तान आईसीसी टी–२० विश्वकप क्रिकेटको सेमिफाइनलमा पुगेको छ। मंगलबार राति भएको खेलमा पाकिस्तानले नामिबियालाई ४५ रनले हरायो।
टस जितेर पहिले ब्याटिङ गरेको पाकिस्तानले निर्धारित ओभरमा मात्र २ विकेट गुमाएर १८९ रन बनाएको थियो। जबाफी ब्याटिङमा उत्रिएको नामिबियाले भने २० ओभरमा ५ विकेट गुमाउँदै १४४ रन मात्रै बनाउन सक्यो।
पाकिस्तानका लागि कप्तान बाबर आजम र मोहमद रिजवानले अर्धशतकीय पारि खेले। ओपनरद्वय आजम र रिजवानले पहिलो विकेटका लागि ११३ रनको साझेदारी गरेका थिए। १४.२ ओभरमा आजम ७० रन बनाएर आउट भएका थिए। ४९ बलमा ७० रन बनाएका आजमले ७ चौका प्रहार गरेका थिए।
यसैगरी १५.४ ओभरमा १२२ रन बनाउँदा पाकिस्तानले दोस्रो विकेट गुमाएको थियो। दोस्रो विकेटको रुपमा फकर जमा ५ बलमा ५ रन बनाएर आउट भएका थिए। त्यसपछि रिजवान र मोहम्द हाफिजले पाकिस्तानको पारि सम्हालेका थिए।
रिजवानले ५० बलमा नटआउट ७९ रन बनाए । रिजवानले ४ छक्का र ८ चौका प्रहार गरे। हाफिसले १६ बलमा ३२ रन बनाए। उनले ५ छक्का प्रहार गरे।
नामिवियाका लागि जेन फ्रांकिलिन र डेभिड वेजसले १–१ विकेट लिए।
जवाफी ब्याटिङमा उत्रिएको नामिबियाले दोस्रो ओभरमा मात्र ८ रन हुँदा पहिलो विकेट गुमाएको थियो। पहिलो विकेटको रुपमा मिचेल भान मात्र ४ रन बनाएर पेभेलियन फर्किए। त्यसपछि ८.४ ओभरमा ५५ रन हुँदा दोस्रो विकेट गुम्यो। दोस्रो विकेटको रुपम कप्तान गेरहार्ड इरसमुस १५ रन मात्रै बनाएर आउट भए।
यस्तै, तेस्रो विकेटको रुपमा स्टेफेन बार्ड २९ रनमा आउट भए भने चौथो विकेटको रुपमा जे जे स्मिथ मात्र २ रन बनाएर आउट भए। क्रेग विलियम्स ४० रन बनाएर पाँचौ विकेटको रुपमा आउट भए।
लगातार चौथो जितसँगै पाकिस्तानले ८ अंक बनाएको छ। जारी प्रतियोगितामा सेमिफाइनलमा पुग्ने पाकिस्तान दोस्रो टिम बनेको छ । यसअघि समुह ए बाट इंग्ल्याण्डले सेमिफाइनलमा स्थान बनाइसकेको छ ।
