२० मंसिर, एजेन्सी ।
रुस–युक्रेन संकट चुलिएको लामै समय भयो । अमेरिकी अधिकारीहरुले यही नयाँ वर्षको छेको पारेर युक्रेन कब्जा गर्ने रणनीति बनाएको खुलासा गरेपछि युक्रेन अहिले तनाव र त्रसित बनेको छ । रुसले युक्रेनको सिमानामा सेना तैनाथ गरेको छ । यसलाई लिएर रुस र अमेरिकाबीच पनि तनाव बढेको छ ।
बढ्दाे तनावका बीच मंगलबार रुसी राष्ट्रपति भ्लादिमिर पुटिन र अमेरिकी राष्ट्रपति जो बाइडेनबीच वार्ता हुने भएको छ । रुस–युक्रेन सीमामा तनाव जारी छ। रुसले जनवरीमा युक्रेनमा आक्रमण गर्न सक्ने अमेरिकी गुप्तचर रिपोर्टले दाबी गरेको छ । यो परिस्थितीमा अमेरिकी राष्ट्रपति जो बाइडेन र रुसी राष्ट्रपति भ्लादिमिर पुटिनले दुई देशबीच जारी तनावका बीच मंगलबार वार्ता गर्ने भएका हुन् ।
रुसी राष्ट्रपतिका प्रवक्ता दिमित्री पेस्कोभले यसको पुष्टि गरेका छन् । दुई नेताबीचको वार्ता कति समय हुन्छ भन्ने विषय चाँही राष्ट्रपतिले निर्णय लिने उनले बताएका छन् । यद्यपि यो जानकारी भने अमेरिकी राष्ट्रपति भवनको ह्वाइट हाउसले दिएको छैन । दुई नेताबीच जुलाईदेखि यता भेटवार्ता भएको छैन् । यसअघि स्कटल्यान्डमा विश्वभरका नेता कोप २६ को विश्व सम्मेलनमा भेला भएपनि पुटिन त्याहा पुगेका थिएनन् । रुस अमेरिकाले युक्रेनलाई नेटो सैन्य गठबन्धनमा समावेश नगर्ने ग्यारेन्टी दिनुपर्नेमा अडिग छ । तर नाटोका महासचिव जेन्स स्टोल्टनबर्गले गठबन्धनमा कसलाई समावेश गर्ने र कसलाई नगर्ने भन्नेमा रुसको कुनै भूमिका नभएको स्पष्ट पारेका छन् ।
पूर्व अमेरिकी र नेटो कूटनीतिज्ञहरूले पनि रूसबाट यस्तो मागको लागि कुनै स्थान नभएको बताएका छन् ।अमेरिकी गुप्तचर निकायले पनि रुसले युक्रेनसँगको सिमानामा करिब ७० हजार सैनिक तैनाथ गरेको भन्दै नयाँ वर्षको सुरुमा आक्रमण हुन सक्छ चेतावनी दिएको छ। तर, यदि पुटिनले यस्तो कदम उठाए भने यो उनको लागि ठूलो जोखिम हुने गुप्तचर निकायको ठहर छ ।
अमेरिकी अधिकारी र पूर्व कूटनीतिज्ञहरूले युक्रेनको सेना पहिलेको तुलनामा अहिले धेरै राम्रो र तयार भएको बताएका छन् । रुसले यो कदम चाले रुसको अर्थतन्त्रलाई पनि ठूलो नोक्सान हुने विश्लेषण छ । युद्धको आशंकाका बीच गत हप्ता रुसी राष्ट्रपति भ्लादिमिर पुटिनले नाटोले युक्रेनको भूमि रुसविरुद्ध प्रयोग गरे त्यसको परिणाम भोग्नुपर्ने चेतावनी दिएका थिए।
युक्रेनमा रुसको सम्भावित आक्रमणबारे पश्चिमी देशहरूले व्यक्त गरेको चिन्ताबारे पुटिनले आफूले पनि आफ्नो सिमानामा नेटोको गतिविधि नियालिरहेको बताएका थिए । युक्रेनले पनि अर्को महिना रुसले आक्रमण गर्न सक्ने आशंका पनि व्यक्त गरेको छ । युक्रेनका रक्षामन्त्री ओलेक्सी रेज्निकोभले रुसका ९४ हजार ३०० सैनिक आफ्नो सीमामा तैनाथ रहेको र जनवरीमा उनीहरुको संख्या अझै बढ्न सक्ने बताएका छन् ।
