२२ मंसिर, काठमाडाैँ ।
नेपाली कांग्रेसका चतुर राजनीतिक खेलाडीका रुपमा चिनिएका सर्लाहीमा सांसद अमरेशकुमार सिंह पार्टीको महाधिवेशन प्रतिनिधिमा भने पराजित भएका छन् । आसन्न १४ औं महाधिवेशनबाट पार्टी केन्द्रको सहमहामन्त्री बन्ने सपना बोकेर सर्लाहीमा प्रतिनिधीका लागि होमिएका अमरेशलाई जिल्ला प्रतिनिधीहरुले उनलाई महाधिवेशन प्रतिनिधी नै बन्न अयोग्यको छाप लगाई दिएका छन् ।
विशेष गरी भारतसँगको निकट सम्बन्धलाई केन्द्रमा राखेर राजनीति गरिरहेका अमरेशको नेतृत्वमा पुग्ने सपनामा अहिलेलाई पनि उनकै कार्यकर्ताले पानी फेरिदिएका छन् । सर्लाही निर्वाचन क्षेत्र नम्बर–४ बाट प्रतिनिधित्व गर्ने उनी कांग्रेसको १४औँ महाधिवेशनअन्तर्गत महाधिवेशन प्रतिनिधिमै पराजित हुन पुगे । बुधबार बिहान सार्वजनिक मत परिणामानुसार सिंहले २४८ मत मात्र प्राप्त गरेका छन् । प्रदेश २ का महिला बालबलिका मन्त्री वीरेन्द्रप्रसाद सिंहले ५१६ मत पाएर प्रतिनिधि बन्दा सिंह २४८ मत पाएर पराजित भए ।
पराजयसँगै सिंहले अब केन्द्रीय महाधिवेशनमा भाग लिन पाउने छैनन् । शेखर कोइराला पक्षमा रहेका सिंहविरुद्ध शेरबहादुर देउवा र विमलेन्द्र निधि पक्ष एक भएका थिए । सिंहलाई हराउनकै लागि सो क्षेत्रका प्रदेश सांसदहरु उपेन्द्र कुशवाह र वीरेन्द्र सिंह एक भएका थिए । अमरेशको पकड भएको तीन वडामा अधिवेशन हुन नदिइएपछि उनी हार्ने आँकलन पहिले नै गरिएको थियो । उनीविरुद्ध गठबन्धन बनाएको अर्को पक्षसँग उनको प्यानल नै पराजित भएको हो ।
प्रतिनिधिसभा चुनावमा भारी मतले जितेका सिंह पार्टीको आन्तरिक चुनावमा भने गुटबन्दीका कारण महाधिवेशन प्रतिनिधिमा पराजित भएका हुन् । अमरेशले पार्टीको केन्द्र र सरकारसमेत आफूलाई हराउन लागि परेको आरोप लगाएका छन् । संस्थापनइतर पक्षलाई कमजोर बनाउन शक्तिको दुरुपयोग गरिएपछि सर्लाहीमा विवाद बढेर वडा अधिवेशनसमेत हुन सकेको थिएन । तीन जना निर्वाचन अधिकृतले चुनाव गराउने नसक्ने भन्दै राजीनामा दिएका थिए । अधिवेशनकै दौरान सर्लाहीमा गोली समेत चलेको थियो ।
सर्लाहीको बलरा नगरपालिका स्थित गडहियामा वडा अधिवेशनका क्रममा मतदान अधिकृतलाई नियन्त्रणमा लिन खोज्दा झड्प भएको थियो । सो क्रममा ३ सुरक्षाकर्मी एक मतदान अधिकृत र एक काग्रेस कार्यकर्ता घाईते भएका थिए । त्याहा वीरेन्द्र कुमार सिंहका अंगरक्षकले गोली चलाएका थिए । अमरेश र वीरेन्द्र एउटै निर्वाचन क्षेत्रबाट र एउटै पार्टीबाट निर्वाचित भएपनि यी दुबैबीच शुरुदेखि नै द्वन्द्व रहँदै आएको थियो । एउटै पार्टीमा भएपनि एकले अर्कालाई देखिनसक्ने स्थितिमा थिएनन् । साउन ७ गते अमरेशलाई कारवाहीको माग गर्दै वीरेन्द्रसहित १२ नेताले पार्टी सभापति शेरबहादुर देउवालाई ज्ञापन बुझाएका थिए । क्रियाशील सदस्यता वितरणमा असन्तुष्टि जनाउँदै अमरेशले प्रतिनिधिसभा सदस्य पदबाट राजीनामा बुझाएपछि वीरेन्द्रसहितका नेताले उनलाई कारवाही गर्न माग गरेका थिए । पार्टी विरोधी र पार्टी संगठनलाई कमजोर गर्ने कार्यमा अमरेश लागेको भन्दै विधान बमोजिम कारबाही नभए आफूहरुले नै राजीनामा दिने उनीहरुले चेतावनी दिएका थिए ।
