२३ मंसिर, एजेन्सी ।
क्याटलान क्लब बार्सिलोना च्याम्पियन्स लिगको समूह चरणबाटै बाहिरिएको छ । बुधबार राति भएकाे खेलमा जर्मन क्लब बायर्न म्युनिखसँग ३–० को हार र अर्काे खेलमा बेन्फिकाले जित निकालेपछि बार्सिलोना समूह चरणबाटै बाहिरिएको हो ।
बर्सिलोना दुई दशकपछि समूह चरणबाट बाहिरिएको हो । यसअघि सन् २०००/०१ सिजनमा समूह चरणबाट बाहिरिएको थियो । जाभी हर्नान्डेज च्याम्पियन्स लिगबाट बाहिरिने बार्सिलोनाको खेलाडी र प्रशिक्षक बनेका छन् । २०००–०१ म जाभी बार्सिलोनाको युवा खेलाडी र यसपटक टोलीको मुख्य प्रशिक्षक रहेका थिए ।
एलिएन्ज एरिना म्युनिखमा बुधबार राति भएको खेलमा घरेलु टोली बायर्नको जितमा थोमस मुलर, लिरोए साने र जमल मुसिएलाले गोल गरे । बायर्नले पहिलो हाफमा दुई तथा दोस्रो हाफमा एक गोल थपेको थियो ।
खेलको ३४औं मिनेटमा थोमस मुलरले गोल गर्दै घरेलु टोली बायर्नलाई अग्रता दिलाए । उनले रोबर्ट लेवान्डोस्कीको पासमा हेडमार्फत गोल गरेका थिए । ४३औं मिनेटमा लिरोए सानेले गोल गर्दै बायर्नको अग्रता दोब्बर पारे । उनले किङ्सले कोमानको पासलाई सदुपयोग गरे ।
६२औं मिनेटमा जमल मुसिएलाले गोल गर्दै बायर्नलाई ३–० ले अघि बढाए । उनले अलफन्सो डाभिसको पासमा गोल गरेका थिए । त्यसपछि थप गोल निस्कन नसक्दा बायर्नले जित निकाल्दै बार्सिलोनालाई समूह चरणबाटै नकआउट गराए । प्रतिस्पर्धात्मक खेलमा बार्सिलोनाले केही अवसर सिर्जना गरेपनि सदुपयोग गर्न नसक्दा पराजित हुन पुग्यो ।
यो जितसँगै बायर्नले समूह ‘ई’ मा शतप्रतिशत जित निकाल्दै समूह विजेता बन्दै प्रि–क्वाटरफाइनलमा पुग्न सफल भयो । बायर्नले ६ खेलबाट १८ अंक जोड्यो । पराजित बार्सिलोना ७ अंक जोडेर तेस्रो स्थानमा रह्यो ।
बार्सिलोनाले समूह चरणमा दुई जित, एक बराबरी र तीन हारको नतिजा निकाल्यो । बार्सिलोनाले बायर्नसँग दुई खेलमा समान ३–० र बेन्फिकासँग ३–० को कै हार बेहोरेको थियो । डेनामो किएभलाई दुवै खेलमा समान १–० ले पराजित गर्दा बेन्फिकासँग एक खेलमा गोलरहित बराबरी खेल्यो ।
यही समुहको अर्काे खेलमा पोर्चुगिज क्लब बेन्फिकाले युक्रेनी क्लब डेनामो किएभलाई २–० ले पराजित गर्दै समूह उपविजेताको रुपमा अन्तिम १६ मा पुग्न सफल भयो । बेन्फिकाले समूह चरण पार गर्न जित निकाल्नै पर्ने खेलमा जित तथा अर्काे खेलमा बार्सिलोनाले हार भोगेपछि समूह चरण पार गर्न सफल भएको हो ।
