१९ पुस, विराटनगर ।
सेयर बजारमा सोमबार पनि उच्च सुधार देखिएको छ। बजार ३२.०३ अंकले बढेर २६१६.९४ अंकमा पुगेको छ।
नेपाल स्टक एक्सचेन्ज (नेप्से) का अनुसार, साताको दोस्रो कारोबार दिन धितोपत्र बजार मापक नेप्से परिसूचक १.२४ प्रतिशतले वृद्धि भएको छ।
दिनभरीमा २३० कम्पनीका कुल ८२ लाख ५ हजार ५२ कित्ता सेयर किनबेच भएको छ।
कुल ४ अर्ब ५३ करोड ३० लाख रुपैयाँको सेयर किनबेच भएको छ। कारोबार सङ्ख्या ५४ हजार ५०५ रहेको नेप्सेले जनाएको छ। कारोबार भएका कुल १३ वटा उपसमूहमध्ये अधिकांशको मूल्य वृद्धि भएको छ। उत्पादन तथा प्रशोधन उपसमूह भने ०.०३ प्रतिशतको गिरावट देखिएको छ।
ब्यापार उपसमूह भने सर्वाधिक बढेको छ। यो उपसमूह ७.०४ प्रतिशतले वृद्धि भएको हो। लघुवित्त उपसमूह २.८८ प्रतिशतले वृद्धि हुँदा वित्त उपसमूह २.०५ प्रतिशतले, लगानी उपसमूह १.८७ प्रतिशतले, विकास बैंक उपसमूह १.६८ प्रतिशतले, वाणिज्य बैंक उपसमूह १.४६ प्रतिशतले र सामुहिक लागनी कोष उपसमूह १.२० प्रतिशतले वृद्धि भएको छ।
कारोबारका आधारमा आज हिमालयन डिस्टिलरी शीर्ष स्थानमा रह्यो। आइतबार कम्पनीको २८ करोड ४४ लाख अधिकको कारोबार भएको छ। उक्त कम्पनी आज धितो पत्र बजारमा १.६० प्रतिशतले घटेको छ।
सर्वाधिक कारोबार हुने अर्को कम्पनी अपि पावर रहेको छ। अपि पावरको १८ करोड २९ लाख बारबारको कारोबार भएको छ। अपि पावर यस दिन ०.४३ प्रतिशतले वृद्धि भएको छ।
सर्वाधिक कमाउने मध्ये भोटेकोशीका लगानीकर्ता रहेका छन्। कम्पनीका लगानीकर्ताले १० प्रतिशतका दरले कमाएका छन्। त्यसैगरी गुराँस लघुवित्तका लगानीकर्ताहरूले पनि यस दिन ९.४५ प्रतिशतका दरले कमाएका छन्। आज एनआईसी एशियाका लगानीकर्ताहरूले पनि ८ प्रतिशत अधिकका दरले कमाएका छन्।
यता, रुरु जलविद्युत परियोजनाका लगानीकर्ताले यस दिन सबै भन्दा धेरै गुमाएका छन्। सोमबार उक्त कम्पनीका लगानीकर्ताले २.५९ प्रतिशतका दरले गुमाएका छन्।
त्यस्तै, नेपाल बंगलादेश बैंक, कालिका पावर, लुम्बिनी जनरल इन्स्योरेन्स, युनाइटेड इन्स्योरेन्स र सूर्या लाइफ इन्स्योरेन्सका लगानीकर्ताले पनि २ प्रतिशत अधिकका दरले गुमाएका छन्।
