१ चैत, एजेन्सी । रुससँग एक–दुई हप्तामा शान्ति सम्झौता हुन सक्ने युक्रेनका एक अधिकारीले बताएका छन् ।
युक्रेनी राष्ट्रतिका सल्लाहकार ओलेक्सी अरेस्टोभिकले रुससँग चाँडै नै शान्ति सम्झौता हुन सक्ने बताएका हुन् । वैशाखभित्रमा जारी युद्ध अन्त्य हुने पनि उनको भनाइ थियो ।
सोमबार सार्वजनिक गरिएको एक भिडियोमा अरेस्टोभिकले रुससँग एक–दुई हप्तामा शान्ति सम्झौता हुन सक्ने बताएका हुन् ।
शान्ति सम्झौतापछि युक्रेनबाट रुसी सेना फिर्ता हुने पनि उनको भनाइ थियो । जारी युद्ध चर्किँदै गए रुसको सैन्य स्रोत–साधन कम हुँदै जाने र बैशाखमा युद्ध अन्त्य हुन सक्ने पनि उनको भनाइ थियो ।
शान्ति सम्झौतापछि एक वर्षसम्म फाटफुट भिडन्त हुन सक्ने पनि अरेस्टोभिकले बताए । तर आफूहरूले युक्रेनबाट सबै रुसी सैनिकको बहिर्गमनलाई विशेष जोड दिने पनि उनको भनाइ थियो ।
रुसले युक्रेनमा विशेष सैन्य कारबाही सुरु गरेको २० दिन भइसकेको छ । यस अवधिमा सैयौंको ज्यान गइसकेको छ ।
युद्धका कारण लाखौं मानिस विस्थापित भइसकेका छन् । मानवीय संकट बढ्दै गएपछि दुबै पक्षले साझा बिन्दु खोजेर जारी युद्धलाई अन्त्य प्रयास गरिरहेका छन् ।
