विराटनगर, १२ वैशाख । विद्यार्थी राजनीतिबाट राजनीतिमा प्रवेश गरेका सागर उमेरले अहिले ४६ पुगे । शैक्षिक हिसाबले स्नातकोत्तर सम्म गरेका थापाको विराटनगरमा सुरुवाती राजनीतिक पहिचान अखिलबाट भयो । विराटनगरको पुरानो महेन्द्र मोरङ क्याम्पसको दुई कार्यकालका स्ववियु सभापति हुन् थापा । २०५५ सालको स्ववियु निर्वाचनमा अनेरास्ववियुका नेता ऋषिकेश पोख्रेल पराजित भएका थिए । त्यसपछि २०५७ सालको स्ववियु निर्वाचनमा अनेरास्ववियुले थापालाई सभापतिमा उठायो ।
एमाले निकट अनेरास्ववियुको सङ्गठन कमजोर हुँदा समेत सभापति जितेपछि थापाको राजनीतिक उचाइ बढ्यो । पहिलो पटक थापाले नेवि संघकी पूजा कोइरालालाई हराएर स्ववियु सभापति बने । पहिलो पटक २०५७ सालमा थापा महेन्द्र मोरङ क्याम्पसको स्ववियु सभापति हुँदा अहिलेका मेयर भीम पराजुली कोषाध्यक्ष थिए ।
त्यसपछि फेरि २०६० सालको स्ववियु निर्वाचनमा थापाले हालका प्रदेश एकका आन्तरिक मामिलामन्त्री केदार कार्कीलाई हराएर दोस्रो पटक स्ववियु सभापति बने । त्यो कार्यकालमा विराटनगरका मेयर पराजुली सचिवमा निर्वाचित भएका थिए । जटिल राजनीतिक परिस्थितिलाई सहज बनाउने छवि थापाले पार्टी भित्र बनाएका छन् ।
स्ववियु सभापतिमा उठ्दा पनि सङ्गठनको अवस्था कमजोर छ भनेर हल्ला चलाइएको र अहिले पनि एमालेको परिस्थिति ठीक छैन भनेर हल्ला चलाइए पनि अवस्थालाई आफु अनुकुल बनाउने थापाले दावी गरे । तत्कालीन विद्यार्थी राजनीति गरेका थापा अहिले नेकपा एमाले विराटनगर महानगर कमिटीको अध्यक्ष छन् ।
नेकपा एमाले महानगर कमिटी इन्चार्ज हुँदै संयोजक र अध्यक्ष भई लगातार १२ वर्षदेखि विराटनगर महानगरको नेतृत्व थापाले गरेका छन् ।
