१५ असोज, एजेन्सी ।
इन्डोनेसियामा एक फुटबल खेलमा भागदौडका क्रममा १२७ जनाको मृत्यु भएको छ । सोहीक्रममा १८० जना घाइते भएको छ । इन्डोनेसियास्थित पूर्वी जाभा प्रान्तको रंगशालामा खेल सकिएपछि दंगा भएको थियो । त्यसपछि भएको भागदौडमा सो हताहती भएको जाभा प्रान्तको प्रहरी प्रमुखले बताएका छन् ।
इन्डोनेसियाली प्रिमियर लिगको खेल समाप्त भएपछि दुई प्रतिद्वन्द्वी फुटबल टोलीका समर्थकहरू बीच धेरै विवाद भएको थियो । जसमा पर्सेबाया सुराबायाले अरेमा मलंगलाई ३–२ ले हराएको थियो । हार्ने पक्षका समर्थकहरूले पिचमा आक्रमण गरेका थिए भने भीड नियन्त्रण गर्न अधिकारीहरूले अश्रु ग्यास प्रहार गरेका थिए ।
जसका कारण भीडमा भागदौड मच्चिएको थियो ।अश्रु ग्यासबाट बच्न सयौं मानिस बाहिर निस्किएर गेटमा दौडिए । कोही अराजकतामा निसासिए र अरूलाई कुल्चिए, जसबाट धेरै मानिसहरूको तत्कालै मृत्यु भएको समाचार एजेन्सी एएफपीले इन्डोनेसियाली प्रहरीलाई उद्धृत गर्दै बताएको छ ।
३ सयभन्दा बढी घाइतेहरूलाई उपचारका लागि नजिकैका अस्पतालहरूमा लगिएको थियो तर धेरैको बाटोमा र धेरैको उपचारका क्रममा मृत्यु भएको हो । पूर्वी जाभाका प्रहरी प्रमुख निको अफिन्ताका अनुसार घटनामा दुई जना प्रहरीको पनि मृत्यु भएको छ । ‘३४ जनाको रंगशालाभित्रै मृत्यु भएको हो । अरुको उपचारका क्रममा अस्पतालमा मृत्यु भएको उनले बताएका छन् ।
उनका अनुसार रंगशालामा अक्सिजनको कमि भएका कारण उनीहरुको मृत्यु भएको हो । घटनाबारे अनुसन्धान सुरु भएको बताउदै इन्डोनेसियन फुटबल एसोसिएसनले यो घटनाले इन्डोनेसियन फुटबललाई ’कलंकित बनाएको’ बताएको छ । घटनापछि यहाँकै मुख्य मानिने लिग बिआरई लिग १ एक साताका लागि रोकिएको छ ।
