विराटनगर,भदौ ८
एसिया कप छनोटका लागि श्रीलंकामा अभ्यासमा रहेको नेपाली क्रिकेट टोलीले अभ्यास खेलमा लगातार दोस्रो जित निकालेको छ । आज भएको अभ्यास खेलमा श्रीलंकाको स्थानिय क्लब ब्लुमफिल्डलाई १ सय ७६ रनले पराजित गर्दै नेपालले लगातार दोस्रो जित निकालेको हो ।
नेपालले पेश गरेको ३ सय २४ रनको लक्ष्य पछ्याएको ब्लुमफिल्डले ३८ औं ओभर ब्याटिङ गरिरहँदा खराब प्रकाशले खेल सुचारु हुन सकेन । त्यसपछि खेल सुचारु हुन नसक्दा नेपालले डक वर्थ लुईस नियमको आधारमा जित निकालेको हो ।ब्लुमफिल्ड क्रिकेट मैदान टस जितेर पहिले ब्याटिङ गरेको नेपालले दीपेन्द्रसिंह ऐरी र सागर पुनको उच्च प्रदर्शनमा ५० ओभरमा ८ विकेट गुमाएर ३ सय २३ रनको विशाल योगफल तयार पार्न सफल भयो ।
दीपेन्द्रले ९५ बल खेल्दै सर्वा्धिक १ सय २१ रन जोडे भने सागर पुनले ८३ बल खेल्दै ९२ रन प्रहार गरे । एक समय ८४–४ को स्थितिमा रहेको नेपाल सागर र दीपेन्द्रको उत्कृष्ट ब्याटिङ प्रदर्शनसँगै उकासिएको थियो । नेपाली टोलीका लागि दीपेन्द्र र सागरले १ सय ८५ रनको साझेदारी गरेका थिए ।
त्यस्तै ओपनर अनिल साह १७ रन जोड्दै आउट भए । कप्तान पारस २३ रनमा बोल्ड भए भने अर्का ओपनर सुवास खकुरेल ९ रन जोड्दै क्याचआउट हुन पुगे । ब्याटिङक्रममा बढुवा भएका रोहितले ११ रनमात्र जोड्न सके । करण केसीले १२ बलमा २६ रन जोडे ।
ब्लुमका लागि सनोजले सर्वाधिक ३८ रन बनाउदा अन्य ब्याट्सम्यानले राम्रो प्रदर्शन गर्न सकेनन् । सचिनले ३० रन जोडे । कसुन र सेसन समान १६ रनमा आउट भए । निपुनले १२ रन बनाए । नेपालका सागर पुनले ३ विकेट लिए । ललित भन्डारीले दुई तथा पारस खड्का, ललित राजवंशी र बसन्त रेग्मीले समान १ विकेट लिए ।
नेपालले आइतबार कोल्र्टस् क्रिकेट क्लबसँग अन्तिम अभ्यास खेल खेल्नेछ । त्यसपछि नेपाली टोली एसिया कप छनोटको लागि २७ अगस्टमा मलेसिया प्रस्थान गर्नेछ । नेपालको खेलका लागि सिपीएल खेल्दै गरेका सन्दीप लामिछाने पनि २८ अगस्टमा टिमसँग जोडिनेछन् ।
