Nepal Times
Nepal Times
3
Shares

रामचन्द्रको बाटो गोविन्दराजले छेक्ने

रामचन्द्रको बाटो गोविन्दराजले छेक्ने

२३ असोज, काठमाण्डौ ।

एक पटक राष्ट्रपति वा प्रधानमन्त्री बन्ने चाहानासहित चुनावी मैदानमा होमिएका नेपाली कांग्रेसका वरिष्ठ नेता रामचन्द्र पौडेललाई पुरानै कट्टर प्रतिद्वन्दीले बाटो छेक्ने भएका छन् । कांग्रेसका पूर्व–सहमहामन्त्री गोविन्दराज जोशीले तनहुँ–१ बाट प्रतिनिधिसभा सदस्यका लागि स्वतन्त्र उम्मेदवारी दिएका छन् ।

निर्वाचन अधिकृतको कार्यालय पुगेर आइतबार जोशीले उम्मेदवारी दर्ता गरेका हुन् । जोशीका प्रस्तावक रामदेव पन्थ र समर्थकमा कृष्णप्रसाद सोती छन् । सोही क्षेत्रबाट कांग्रेस वरिष्ठ नेता रामचन्द्र पौडेल पनि चुनाव लड्दैछन् । २०७४ को निर्वाचनमा पनि जोशीले उक्त क्षेत्रबाट उम्मेदवारी दिएका थिए ।

उनका उम्मेदवारीविरूद्ध पौडेलले निर्वाचन आयोगमा उजुरी दिएपछि आयोगले जोशीको उम्मेदवारी खारेज गरेको थियो । भ्रष्टाचार मुद्दा अख्तियारमा विचाराधीन रहेको भन्दै त्यतिबेला निर्वाचन आयोगले जोशीको उम्मेदवारी खारेज गरेको थियो । अदालतबाट फैसला नभएकाले उम्मेदवारी दिन पाउने जोशी पक्षको जिकिर छ । कांग्रेसभित्र जोशी र पौडेलबीच द्वन्द्व छ ।

पौडेललाई निर्वाचनमा सहयोग नगरेको र बागी उम्मेदवारी दिएको भन्दै कांग्रेसले जोशीलाई पार्टी साधारण सदस्यसमेत नरहने गरी निष्काशन गरेको थियो । पार्टीबाट निष्कासनमा परे पनि जोशी भने स्वतन्त्र रूपमा पौडेलविरूद्ध गतिविधि गर्दै आएका छन् ।

जोशीकै समर्थनमा गत निर्वाचनमा तत्कालीन एमाले नेता कृष्णकुमार श्रेष्ठले उक्त क्षेत्रबाट चुनाव जितेका थिए भने पौडेल पराजित भएका थिए । यसपटकको निर्वाचनमा जोशीलाई एमालेले सघाउने तयारी गरेको छ । यसअघि गएको स्थानीय तहको निर्वाचनमा पनि गोविन्द राज जोशीका छोरा दीपकराज जोशीले व्यास नगरपालिकामा मेयरका लागि काग्रेसका उम्मेदवारविरुद्ध मेयरमा उम्मेदवारी दिएका थिए ।

निर्वाचनकै क्रममा उनीमाथि रिस्ती मतदान केन्द्रमा पुगेको बेला कांग्रेस कार्यकर्ताले नै उनीमाथि आक्रमण गरेका थिए । तनहुँमा कांग्रेसका वरिष्ठ नेता पौडेल र पूर्वमन्त्री समेत रहेका कांग्रेस नेता गोविन्द राज जोशीबीच लामो समयदेखि राजनीतिक टकराब जारी छ। जोविन्दराजले आफू प्रति भ्रष्टाचारको मुद्दा र पार्टीको कारबाही प्रक्रियामा समेत नेता पौडेलको हात रहेको आरोप लगाउँदै आएका छन्।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.