१९ कात्तिक, काठमाण्डौ ।
एमाले अध्यक्ष केपी शर्मा ओलीले आफूबारे दिएको अभिव्यक्तिलाई लिएर नेता भीम रावलले आपत्ति जनाएका छन् । कञ्चनपुरको चुनावी सभामा ओलीले उत्तेजना प्रस्तुत गरेको भन्दै रावलले आपत्ति जनाएका हुन् ।
शुक्रबार कञ्चनपुरको चुनावी सभामा डडेलधुरामा नेपाली कांग्रेस बीपीका उम्मेदवार कर्ण मल्ललाई एमालेले समर्थन गर्ने घोषणा गर्दैगर्दा दर्शकदीर्घाबाट ’भीम रावल, भीम रावल’ नारा लागेपछि अध्यक्ष ओली आक्रोशित बनेका थिए । सो क्रममा उनले आक्रोशित हुँदै ’सुदूरपश्चिममा धेरै रावल रहेकाले बूढो भीम रावलको चिन्ता नगर्न’ आग्रह गरेका थिए ।
ओलीले भने, ’भीम रावलको तपाईलाई किन चिन्ता, ४८ सालदेखि एक छिन मुख खाली छैन, बूढो भइसक्नु भयो, बेकार किन भीम रावलको चिन्ता, अरुलाई पालो दिनु पर्दैन, एउटै भीम रावल, भीम रावल, केको खेती गरिराख्या भीम रावल, के भीम रावल, थुप्रै रावलहरु हुनुहुन्छ नि त सुदूरपश्चिममा थुप्रो रावलहरुलाई अगाडि बढाइन्छ ।’
यसैमा आपत्ति जनाउँदै गएराति सामाजिक सञ्जालमार्फत रावलले ओलीको अभिव्यक्तिलाई लिएर विभिन्न पाँचवटा प्रश्न गरेका छन । साथै रावलले अध्यक्ष ओलीको अभिव्यक्तिले बदला, निषेध र द्वेषपूर्ण भाव उदांगो भएको पनि टिप्पणी गरे ।
रावलले ओलीलाई भनेका छन्, ‘म ६७ वर्ष लागेकालाई बूढो भन्ने हो भने ७० वर्ष कटिसकेका ओलीजी सांसद र फेरि प्रधानमन्त्रीका लागि कसरी तन्नेरी हुनुभयो?’ सुदूरपश्चिममा भीम रावलले मात्रै अवसर पाउनुपर्ने कारण नरहेको भन्ने ओलीको अभिव्यक्तिलाई उनले ‘केपी ओलीले मात्रै अवसर पाउनुपर्ने कारण नरहेको’ प्रतिक्रिया दिए ।
रावलले सामाजिक सञ्जालमा लेखेका छन्, ’ मलाई ४८ सालमा तत्कालिन महासचिव मदन भण्डारी र नेता माधव नेपालले चुनाव नजितिने भए पनि हाम्रा मतहरु सुरक्षित गर्न अछाममा गएर लड्नु होस् भन्दा म तयार भएँ तर सांसद ५१ सालदेखि मात्र भएँ । ओलीजी ४८ सालदेखि सांसद, मन्त्री, पार्टी अध्यक्ष र प्रधानमन्त्री हुनुभएको छ, कहिल्यै “मुख खाली छैन“ र फेरि पनि “खान“ का लागि किन मुख बाउनु भएको त?’
ओलीले थर विशेषलाई उल्लेख गरी सुदूरपश्चिममा थुप्रै रावल भएका र तीनलाई अगाडी बढाउने भन्दै व्यक्तिगतरुपमा अपमान हुने गरी बोलेको भन्दै रावलले आक्रोस पनि व्यक्त गरे । मापदण्ड बनाएर अरुलाई पालो दिन टिकट दिइएको भए आफूलाई कुनै आपत्ति नहुने पनि उनको भनाइ छ ।
उनले अगाडि भनेका छन्, ’हो, अरुलाई पालो दिन पार्टीले मापदण्ड बनाएमा सबैले मान्नु पर्छ । तर अरुलाई पालो दिनु पर्ने भए ओलीजी र सचिवालय तथा स्थायी कमिटीका अनेकौं पदमा रहेका र अनेकौं पटक सांसद र मन्त्री भएका व्यक्तिका हकमा अरुलाई पालो दिनुपर्ने भन्ने किन लागू नहुने त ?’ पार्टी अध्यक्ष र प्रधानमन्त्री भइसकेको व्यक्तिबाट मञ्चमा भाषण गर्दैगर्दा प्रदर्शन गरिएको उत्तेजनाले अछामी जनताको तर्फबाट भएको निर्णय उल्ट्याउनुको रहस्यको एउटा पर्दा उघ्रिएको पनि रावलको भनाइ छ ।
पूर्वउपाध्यक्षसमेत रहेका रावललाई अछाम १ बाट सर्वसम्मत रुपमा सिफारिस भए पनि एमालेले टिकट नदिएको हो । निर्वाचन क्षेत्र १ बाट उम्मेदवार बनाउनका लागि प्रतिनिधिसभा निर्वाचन समन्वय कमिटी र अछाम जिल्ला कमिटीले रावलको नाम एकल सिफारिस गरेर पठाएको थियो । रावलको स्थानमा एमालेले झपट बोहोरालाई टिकट दिएको छ । रावलले ओलीसँग १० औँ महाधिवेशनमा अध्यक्षमा प्रतिस्पर्धा गरेका थिए ।
