Nepal Times
Nepal Times
369
Shares

रुसको निशानमा युक्रेनी उर्जा / हिउँले कठ्याङ्ग्रियो शहर, न तातोपानी न हिटर

रुसको निशानमा युक्रेनी उर्जा / हिउँले कठ्याङ्ग्रियो शहर, न तातोपानी न हिटर

८ मंसिर, एजेन्सी ।

लगातारको रुसी बमबारीका कारण सिंगो युक्रेन अहिले अन्धकारमय बनेको छ । देशभर विद्युत् कटौती भएको छ । विद्युत् कटौती भएका कारण तीन वटा पारमाणविक रियाक्टरहरू बन्द गर्न युक्रेनी अधिकारीहरू बाध्य भएका छन् । हिउँद सुरु भएसँगै मस्कोले युक्रेनको ऊर्जा पूर्वाधारमा आक्रमण बढाएको छ ।

युक्रेनी अधिकारीहरूका अनुसार रुसको क्षेप्यास्त्र आक्रमणले ऊर्जा केन्द्रहरूमा व्यापक क्षति पु¥याएको छ र देशको आधा भन्दा बढी ऊर्जा वितरण गर्ने प्रणालीहरू मर्मत गर्नु पर्ने स्थितिमा पुगेका छन् । यसलाई युक्रेनी राष्ट्रपति भोलोदिमिर जेलेन्स्कीले मस्कोले “मानवता विरुद्धको अपराध“ गरेको आरोप लगाएका छन् ।

न्यूयोर्कमा संयुक्त राष्ट्र सुरक्षा परिषद्को आकस्मिक बैठकलाई सम्बोधन गर्दै जेलेन्स्कीले पछिल्ला आक्रमणहरूका कारण तापक्रम शून्य डिग्री सेल्सियसभन्दा कम भएको अवस्थामा समेत “लाखौँ मानिसहरू ऊर्जा आपूर्ति, न्यानो र पानी विना बस्न“ बाध्य भएको बताएका छन् ।

“यो रुसको आतङ्कको सूत्र हो,“ उनले भिडिओमार्फत् न्यूयोर्क रहेका प्रतिनिधिहरू समक्ष भनेका छन् । बुधवार पनि युक्रेनभरि हवाई आक्रमणको चेतावनी जारी गरिएको थियो । त्यस लगत्तै राजधानी किभ र पश्चिमी सहर लभिभलगायत धेरै स्थानहरूमा विस्फोट भएको विवरणहरू सार्वजनिक भए ।

दक्षिणी जापोरीजा क्षेत्रस्थित प्रसूति गृहमा क्षेप्यास्त्र प्रहार हुँदा एक नवजात शिशुको मृत्यु भएको आपत्कालीन सेवा प्रदायकहरूले जानकारी दिएको बीबीसीले उल्लेख गरेको छ । युक्रेनी सशस्त्र सेनाका कमान्डर जनरल भ्यालेरी जालुज्नीका अनुसार मस्कोले ६७ वटा लामो दूरीको क्षेप्यास्त्रहरू प्रक्षेपण गरेको थियो ।

तीमध्ये ५१ वटा प्रक्षेपणलाई देशको हवाई सुरक्षा प्रणाली ले सफलतापूर्वक रोकेको जनाइएको छ । तर आक्रमणले देशभरका पूर्वाधारहरूमा ठूलो क्षति पु¥याएको छ । किएभमा सहरका केही भागहरूमा मानिसहरू पूर्ण रूपमा पानी र बिजुलीबाट वञ्चित भएका छन् ।

मेयर भिटाली क्लिट्स्कोका अनुसार साँझसम्ममा कम्तीमा ८० प्रतिशत बासिन्दाहरू बिजुली र पानीविना बसेका हुन् । प्रायः ताप तथा जलविद्युत ऊर्जा केन्द्रहरू पनि बन्द गर्न बाध्य भएको युक्रेनको ऊर्जा मन्त्रालयले जनाएको छ ।

माइकोलाइभ क्षेत्रका गभर्नरले दक्षिण र पूर्वतर्फबाट “थुप्रै रकेटहरू“ आइरहेको चेतावनी दिएका छन् ।मस्कोले आफूले युक्रेनको पावर ग्रिडमा आक्रमण गर्दा उनीहरूको लड्ने क्षमता कम हुने र नेताहरूलाई वार्ताको निम्ति तयार पार्न सक्ने बताएको छ ।

तर फ्रान्सेली राष्ट्रपति एमानुअल म्याक्रोनले ट्विटरमा लेखेका छन्,“नागरिक पूर्वाधार“ विरुद्ध त्यस्ता आक्रमणहरू युद्ध अपराध हो ।यसअघि अमेरिकाले पनि उस्तै टिप्पणी गरेको थियो । प्रत्यक्ष रूपमा प्रहार नभए पनि आक्रमणको प्रभाव स्वरूप युक्रेनको छिमेकी राष्ट्र माल्डोभामा पनि विद्युत् कटौती भएको छ।

तपाईंको प्रतिक्रिया

© copyright 2022 and all right reserved to Nepal Times | Design By : InDesign Media Pvt. Ltd.