८ पौष,काठमाडौं ।
१९ वर्ष जेल बसेर छुटेका चार्ल्स शोभराजलाई भोलि मात्र फ्रान्स पठाइने भएको छ।अधिवक्ता निहिता विश्वासले आज कागजी प्रक्रिया नसकिएकोले भोलि मात्र फ्रान्स पठाइने बताइन्।‘मलाई गृह मन्त्रालयबाट फोन आएको थियो। उताबाट आजै सबै कागजी प्रक्रिया नसकिएकोले शोभराजलाई भोलि मात्र फ्रान्सलाई पठाइने भएको छ’, उनले भनिन्, ‘आज एयरपोर्टको इमिग्रेसनमा राख्ने कुरा छ।’
अहिले शोभराजलाई अध्यागमन विभागमै राखिएको छ।विश्वासले शोभराजलाई सुरक्षित घर फर्काउन चाहेको बताएकी छन्।उनले शुक्रबार सेतोपाटीसँग कुरा गर्दै शोभराजलाई मुटुको भल्भको समस्या रहेको र सुरक्षित घर फर्काउन जरूरी भएको बताइन्।
शोभराजको स्वास्थ्य स्थितिलाई लिएर सर्वोच्चले कैदमुक्त गरेको र मुटुको रोग लागेर निधन हुनसक्ने भएकाले केन्द्रीय कारागारबाट सिधै फ्रान्स पठाउन लागिएको उनले जानकारी दिइन्।‘कुनै विलम्ब नभए आजै शोभराजलाई फ्रान्स पठाउने तयारी गरिएको छ,उनले भनिन्।धेरै वर्षपछि आफूहरूको लडाइँ सकिएको उनले बताएकी छन्।साथै, उनले शोभराजका वकिलहरूको टिमलाई बधाई समेत दिएकी छन्।
सर्वोच्चको आदेश अनुसार हत्या अभियोगमा करिब दुई दशकदेखि कारागारमा कैद भुक्तान गरिरहेका शोभराजलाई केन्द्रीय कारागारको गोलघरबाट कैदमुक्त गरी अध्यागमन विभागको जिम्मा लगाइएको छ ।शोभराजमाथि ४७ वर्षअघि काठमाडौं र भक्तपुरमा अमेरिकी र क्यानडेली नागरिकको हत्या गरेको अभियोग लागेको थियो।
२०८० सालसम्म कैद सजाय पाएका उनलाई १९ वर्ष जेलमा बसिसकेको, मुटुरोगी भएको र ७८ वर्षका वृद्ध भइसकेको त्यसमाथि मानवअधिकारको मापदण्ड विपरित कैदभित्र पनि एकान्तवासमा राखिएको भन्दै अदालतले छोड्न आदेश दिएको हो।
