२ माघ,एजेन्सी ।
लियोनल मेसीको पेरिस सेन्ट जर्मेन (पीएसजी) विरुद्धको मैत्रीपूर्ण खेलका लागि क्रिष्टियानो रोनाल्डोलाई अल नासर र अल हिलालको संयुक्त ११ को कप्तानमा चयन गरिएको छ। क्रिस्टियानो रोनाल्डोको पहिलो खेल साउदी अरेबियाको भूमिमा विश्व च्याम्पियन अर्जेन्टिनाका स्टार लियोनल मेसीको पीएसजीसँग हुने अपेक्षा गरिएको छ।
उनी लेस पेरिसियन्स र अल–स्टार इलेवन बीचको मैत्रीपूर्ण खेलमा संलग्न हुने सम्भावना छ, जसमा अल नासर र अल हिलालका खेलाडी बीचको संयुक्त ११ हुनेछ। उक्त खेल बिहीबार जनवरी १९ मा रियादको किंग फहद स्टेडियममा हुने तय भएको छ।
अल–नासरका प्रशिक्षक रुडी गार्सियाले भर्खरै साउदी प्रो लिगको टेबल–टपरहरूको लागि डेब्यु गर्नु अघि पोर्चुगिज आइकनले मैत्रीपूर्ण खेल खेल्ने पुष्टि गरेका छन् । अब रोनाल्डोले प्रदर्शनी खेलमा सहभागी मात्रै नभई अल स्टार ११ को कप्तानी पनि गर्नेछन् भन्ने कुरा बाहिर आएको छ।
उनलाई मेसी र पीएसजीको सामना गर्दा रियादको संयुक्त टोलीको नेतृत्व गर्ने जिम्मेवारी दिइएको छ। साउदी अरेबियाको मनोरञ्जनका लागि जनरल अथरिटीका अध्यक्ष टर्की अल–शेखले ट्विटरमा यो खबरको पुष्टि गरेका छन्। उनले सामाजिक सञ्जालमा पाँच पटकको बालोन डी’ओर विजेतालाई हातब्यान्ड दिएको भिडियो पोस्ट गरेका छन्।
