रविले दिएको अल्टिमेटम सकिने आज अन्तिम दिन

२१ मघ, काठमाण्डौ ।
राष्ट्रिय स्वतन्त्र पार्टीले आफूलाई गृह मन्त्रालय दिने÷नदिनेबारे निर्णय गर्न प्रधानमन्त्रीलाई दिएको २ दिनको समय आज सकिँदै छ । यहीबीच सत्ता साझेदार दलका दुई शीर्ष नेताहरू विहानैदेखि छलफलमा जुटेका छन् । प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीले यसबारे छलफल तिव्र पारेका छन् ।

शनिबार बिहान प्रधानमन्त्री निवास बालुवाटारमा उनीहरुबीच भेटवार्ता भएको हो । रास्वपाले गृह मन्त्रालय नदिए सरकारबाट बाहिरिने चेतावनी दिँदै आएको छ । प्रधानमन्त्री पुष्पकमल दाहाल ‘प्रचण्ड’ले भने रविको नागरिकता अवैध भएको भन्दै सर्वाेच्चले गरेको फैसलाको पूर्णपाठ आएपछि मात्र गृह मन्त्रालयको टुङ्गो लगाउने बताउँदै आएका छन् ।

यता एमालेका अध्यक्ष ओलीले भने रवि लामिछानेलाई गृह मन्त्रालय दिन अदालतको पूर्णपाठ नचाहिने जिकिर गरेका छन् । पूर्वप्रधानमन्त्रीसमेत रहेका ओली रविलाई गृह मन्त्रालय दिन तयार छन् भने प्रधानमन्त्री दाहाल भने गृह मन्त्रालय सुम्पिन तयार भएका छैनन् ।

नागरिकता विवाद प्रकरणका कारण गृहमन्त्री पद छाड्न बाध्य लामिछानेले नागरिकता सक्रिय गराएपछि पुनः गृहमै फर्किने इच्छा गरेका छन् । तर उनीविरुद्ध नागरिकतासंगै राहदानी विवाद कायमै रहेकाले प्रचण्ड गृहबारे निर्णय गरिहाल्ने पक्षमा छैनन् ।

जसका कारण रविले पुनःजिम्मेवारी पाउने या नपाउने भन्ने विषयमा यतिबेला चर्काे बहस चलिरहेको छ । गृह मन्त्रालयबारे सत्ता साझेदार दलबीच खटपट भइरहेका बेला यता नेपाली कांग्रेसले भने विपक्षी दलबीचको संवाद सुरु गरेको छ ।

सिंहदरबारस्थित प्रमुख प्रतिपक्षी नेपाली कांग्रेसको संसदीय दलको कार्यालयमा कांग्रेस, नेकपा एकीकृत समाजवादी र लोकतान्त्रिक समाजवादी पार्टीका शीर्ष नेताबीच छलफल सुरु भएको हो । छलफलमा कांग्रेस सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल, लोसपा अध्यक्ष महन्थ ठाकुर र कांग्रेसकै वरिष्ठ नेता रामचन्द्र पौडेल पनि सहभागी छन् ।

बैठकमा राष्ट्रपति र राष्ट्रियसभाको उपाध्यक्ष चयनबारे छलफल भइरहेको बताइएको छ । राष्ट्रपति चयनका लागि आगामी फागुन २५ गते निर्वाचन हुँदै छ । राष्ट्रपति विद्यादेवी भण्डारीको कार्यकाल आगामी फागुन २८ गते सकिँदै छ ।

राष्ट्रियसभा उपाध्यक्षको निर्वाचन भने यही माघ २३ गते हुँदै छ । राष्ट्रियसभाकी तत्कालीन उपाध्यक्ष शशीकला दहालको कार्यकाल २०७८ फागुन २० गते सकिएको थियो । राष्ट्रियसभाको अध्यक्षमा भने नेकपा एमालेका सांसद देवराज घिमिरे चयन भइसकेका छन् ।