१४ फागुन, काठमाण्डौ ।
आईसीसी विश्व कप क्रिकेट लिग–२ मा नेपालले शीर्ष तीनमा पर्दै सोझै विश्व कप छनोट खेल्न अब बाँकी ८ मध्य ७ खेल जित्नुपर्ने भएको छ । आफ्नो अन्तिम खेलमा हिजो नामिबियाले यूएईलाई हराएसँगै यो समीकरण बनेको हो । लिग–२ का शीर्ष तीन टोलीले आउँदो जुन–जुलाईमा जिम्बाब्वेमा हुने विश्व कप छनोट सोझै खेल्न पाउनेछन् ।
स्कटल्यान्ड र ओमान विश्व कप छनोटमा पुगेका छन् । अब नेपाल, नामिबिया र यूएई मध्ये एक टोलीको सम्भावना छ । नामिबियाको ३६ खेलमा १९ मा जित र १६ मा हारसहित ३९ अङ्क छ । नेपाल २८ खेलमा १२ मा जित र १४ मा हारसहित छैटौँ स्थानमा छ ।
यूएई २८ खेलमा १३ मा जित र १२ मा हारसहित २९ अङ्कका साथ पाँचौँ स्थानमा छ । नेपालले अब यूएई र पपुवा न्युगिनीसँग समान चार÷चार खेल खेल्नेछ । नेपालले नामिबियालाई पछि पार्न ८ मध्य ७ खेल जित्नुपर्ने हुन्छ । नेपालले सबै खेल जित्दा ४२ अङ्क र ७ खेलमा जित्दा ४० अङ्क हुनेछ ।
नेपाल, पपुवा न्युगिनी र युएईबीच दुबईमा सोमबार त्रिकोणात्मक ओडिआई सिरिज चल्नेछ । त्यसपछि यी तीन टोलीबीच टियु मैदानमा लिग २ को अन्तिम त्रिकोणात्मक ओडिआई सिरिज हुनेछ । यदि नेपाल अव दुई खेलमा पराजित भएमा सोझै विश्वकप छनोटको सम्भावना समाप्त हुनेछ ।
र क्वालिफायर प्लेअफ खेल्ने पक्का हुनेछ । यस्तै नेपालले एक दिवसीय मान्यता जोगाउन ८ मध्य ५ खेल जित्नुपर्ने हुन्छ । नेपालले ५ खेल जित्दा ३६ अंक हुनेछ । शीर्ष पाँचमा पर्न ३६ अंक पर्याप्त हुनेछ । किनभने चौथो स्थानमा रहेको अमेरिकाको ३६ खेलमा १६ मा जित र १७ मा हारसहित ३५ अंक छ ।
नेपाल शीर्ष पाँचमा पर्न अमोरिकालाई पछि पार्नुपर्ने हुन्छ । अमेरिकालाई पछि पार्न नेपालले ५ खेल जित्नुपर्ने हुन्छ । पाँच खेल भन्दा कम जितेको खण्डमा भने प्लेअफमा ओडिआई मान्यता निर्भर रहनेछ । लिग २ का पुछारका चार टोलीले क्वालिफायर प्ले अफ खेल्नेछन् ।
क्वालिफायर प्लेअफमा लिग २ का पुछारका चार टोली र क्यानडा र जर्सी रहनेछन् । क्वालिफायर प्लेअफमा शीर्ष चारमा रहने दुई टोलीले ओडिआई मान्यता प्राप्त गर्नेछ । लिग २ मा शीर्ष पाँच र क्वालिफायर प्लेअफमा शीर्ष चारमा पर्न नसके चार वर्षको लागि ओडिआई मान्यता गुम्नेछ ।
