१ चैत , काठमाण्डौ ।
आईसीसी पुरुष क्रिकेट विश्वकप लिग–२ को अन्तिम एकदिवसीय अन्तर्राष्ट्रिय सिरिजको अन्तिम खेलमा नेपाल युनाइटेड अरब इमिरेट्स (यूएई) विरुद्ध खेल्दैछ । नेपाल र यूएईबीचको खेल कीर्तिपुरस्थित त्रिवि क्रिकेट मैदानमा बिहीबार बिहान ९ः३० बजेदेखि हुने तालिका रहेको छ ।
नेपाल र यूएईबीचको खेल नै लिग–२ को अन्तिम खेल हुनेछ । कीर्तिपुरमा भोलि नेपाल र यूएईबीच क्रिकेट खेल हुन गइरहेकोले मौसमबारे धेरैको चासो बढेको छ । यही चासोका बीच भोलि बिहीवार काठमाण्डौ उपत्यकाको मौसम सामान्य बदली भए पनि पानी पर्ने सम्भावना भने निकै कम रहेको मौसमविद्ले बताएका छन् ।
त्रिभुवन विश्वविद्यालयको जल तथा मौसम केन्द्रीय विभागका सहप्राध्यापक तथा मौसमविद् विनोद पोखरेलले पानी पर्ने सम्भावना निकै कम रहेको बताएका छन् । भोलि दिउँसो १ देखि ३ बजेको बीचमा बदली हुने भए पनि पानी पर्ने सम्भावना निकै कम रहेको उनको भनाइ छ ।
भोलि यूएईसँग हुन गइरहेको खेल नेपालका लागि महत्त्वपूर्ण रहेको छ । भोलिको खेल जितेमा नेपालले विश्व कप छनोट खेल्न पाउँछ । खेल जितेमा नेपाल शीर्ष तीनमा रहँदै आगामी जुन जुलाईमा जिम्बावेमा हुने विश्वकप छनोट खेल्न पाउनेछ ।
यदि युएईसँग पराजित भए वा वर्षाको कारण खेल हुन नसके भने नेपालले यसै महिना अन्तिममा नामिबियामा हुने क्वालिफायर प्लेअफ खेल्नुपर्ने हुन्छ । प्लेअफ क्वालिफायरमा शीर्ष दुईमा पर्न सके पुनः विश्वकप छनोट खेल्न पाउनेछ ।
यसैले पानी परेर अंक बाँड्दा नेपालको विश्व कप छनोट खेल्ने लक्ष्य पूरा नहुने भएकोले मैदानमा पानी पर्ने÷नपर्नेबारेमा क्रिकेट समर्थकहरूको चासो छ । अहिलेसम्मको अवस्था हेर्दा भोलि कीर्तिपुरमा पानी पर्ने सम्भावना निकै कम रहेको छ । तर प्रि–मनसुनको समय भएकोले जुनसुकै बेला फाट्टफुट्ट पानी पर्न सक्ने मौसमविद्हरू बताउँछन् ।
