५ चैत, काठमाण्डौ ।
सुनको भाउ अहिलेसम्मकै उच्च भएको छ । आज साताको पहिलो दिन नै तोलाको २ हजार ९ सय रुपैयाँले बढेर सुनको भाउ एक लाख १० हजार रुपैयाँमा पुगेको छ । लगातार उकालो लागेको सुनको भाउ एकै सातामा तोलामै ६ हजार ५ सय रुपैयाँ बढेको हो ।सुनको भाउ अझै बढ्ने अनुमान छ ।
अन्तर्राष्ट्रिय बजारमा बढ्दो अस्थिरता, बेरोजगारीलगायतका कारण सुनको भाउ बढेको हो । भाउ अझै बढ्न सक्ने सङ्केत देखिएको नेपाल सुन चाँदी व्यवसायी महासङ्घले जनाएको छ । यसअघि गएको माघ १९ गते सुनको भाउ अहिलेसम्मकै उच्च तोलामा एक लाख ७ हजार ५ रुपैयाँ पुगेको थियो ।
त्यसयता भने केही घटेको भाउ फेरि लगातार बढिरहेको छ । आज चाँदीको भाउ पनि बढेको छ । तोलामा ३५ रुपैयाँले बढेर चाँदी आज १ हजार ३ सय ४५ रुपैयाँमा कारोबार भइरहेको छ । गत शुक्रबारका तुलनामा ३० रुपैयाँको बढोत्तरीपछि आइतबारको कारोबार मूल्य प्रतितोला १३ सय ४५ भएको हो ।
विश्वबजारमा देखिएको मन्दीसँगै लगानीकर्ता स्टक छाडेर सुनचाँदीमा लगानीमा आकर्षित भएको देखिएको छ । अमेरिकी बजारमा आर्थिक मन्दीको असर स्टक मार्केटमा परेको छ । त्यसैले लगानीकर्ता आफ्नो लगानी सुरक्षित गर्न सुनचाँदीमा आकर्षित भएको अनुमान छ ।
अन्तर्राष्ट्रिय बजारमा गत शुक्रबार प्रतिऔंस १९३०.६१ डलर रहेको सुन आइतबार १९८८.११ डलर पुगेको छ । एक सातामै सुनको कारोबार मूल्यमा ठूलो बढोत्तरी छ । गत आइतबार सुन प्रतिऔंस १८६७.३ डलरमा कारोबार भएको थियो । चाँदी पनि बढेर प्रतिऔंस २२.६ डलर पुगेको छ । गत शुक्रबार २१.९८ डलर थियो भने गत साताको सुरुमा प्रतिऔंस २०.५३ डलरले कारोबार भएको थियो ।
