Nepal Times
Nepal Times
3
Shares

विश्वकप विजेता वेस्टइन्डिज नेपालसँगै खेल्ने/पाकिस्तान विश्वकप खेल्न भारत नजाने

विश्वकप विजेता वेस्टइन्डिज नेपालसँगै खेल्ने/पाकिस्तान विश्वकप खेल्न भारत नजाने

२० चैत , एजेन्सी ।
दुई पटकको विश्वकप विजेता वेस्टइन्डिज आगामी अक्टोबर नोभेम्बरमा भारतमा हुने आइसिसी एकदिवसीय विश्वकपमा सिधा स्थान बनाउनबाट चुकेको छ । उसले अब नेपालले जस्तै विश्वकप छनोट खेल्नुपर्ने भएको छ।आइसिसी सुपर लिगमा दक्षिण अफ्रिकाले नेदरल्यान्ड्सलाई तेस्रो ओडिआई खेलमा १४६ रनले पराजित गरेपछि वेस्टइन्डिजले छनोट खेल्ने पक्का भएको हो ।

आइतबार दक्षिण अफ्रिकाले नेदरल्यान्ड्सविरुद्धको तीन खेलको एकदिवसीय सिरिज २–० ले जितेसँगै आइसिसी एकदिवसीय विश्वकप क्रिकेट २०२३ मा छनोट हुने सम्भावना बलियो बनाएको छ । विश्वकपको छनोटको रुपमा रहेको आइसिसी विश्वकप सुपर लिगमा आठौं स्थानमा उक्लिएसँगै दक्षिण अफ्रिकाको विश्वकपमा छनोट हुने सम्भावना बलियो भएको हो ।

दक्षिण अफ्रिका आठौ स्थानमा उक्लिएसँगै वेस्ट इन्डिज भने विश्वकपमा सिधा छनोट हुन असफल भएको हो । सन् १९७५ र १९७९ को विश्वकप विजेता वेस्ट इन्डिजले अब विश्वकप २०२३ मा स्थान बनाउन छनोट प्रतियोगिता खेल्नु पर्ने भएको छ । यसअघि १९९६ को विश्वकप च्याम्पियन श्रीलंकाले पनि विश्वकपमा सिधा स्थान बनाउन असफल भएको थियो ।

सुपर लिगका शीर्ष आठ टिम भारतमा हुने विश्वकपमा छनोट हुने प्रावधान छ । अब आठौं स्थानको दक्षिण अफ्रिका र एघारौं स्थानको आयरल्यान्ड मध्ये एक टिम मात्र विश्वकपमा छनोट हुनेछ । एघारौं स्थानमा रहेको आयरल्यान्डको पनि मेमा बंगलादेशसँग तीन खेल बाँकी रहेकाले उसको पनि छनोट हुने सम्भावना छ ।

आयरल्यान्डले तीनै खेलमा बंगलादेशलाई हराए विश्वकपमा स्थान बनाउनेछ । विश्वकप २०२३ मा आयोजक भारतसहित सुपर लिगको शीर्ष टिम न्युजिल्यान्ड, इंग्ल्यान्ड, बंगलादेश, पाकिस्तान, अस्ट्रेलिया र अफगानिस्तान गरी सात टिम छनोट भइसकेका छन् । जिम्बावेमा आगामी जुलाईमा हुने विश्वकप छनोटबाट दुई टिम विश्वकपमा पुग्नेछन् ।

विश्वकप छनोटमा नेपालले पनि प्रतिस्पर्धा गर्दैछ । जहाँ नेपालसहित वेस्ट इन्डिज, श्रीलंका, जिम्बावे, नेदरल्याण्ड्स, स्कटल्यान्ड र ओमान गरी ७ टिमले खेल्ने पक्का भइसकेको छ । छनोटमा प्रतिस्पर्धा गर्ने १० मध्ये बाँकी ३ टिमको टुंगो लाग्न बाँकी छ । सुपर लिगबाट एक टिम र प्लेअफ क्वालिफायरबाट दुई टिम विश्वकप छनोटमा पुग्न बाँकी छ । प्लेअफ क्वालिफायर नामिबियामा जारी छ ।

विश्वकप छनोटमा १० टिमलाई दुई समूहमा विभाजन गरिनेछ । दुवै समूहका शीर्ष तीन टिम सुपर सिक्समा पुग्नेछन् । सुपर सिक्सका शीर्ष दुई टिम विश्वकपमा छनोट हुनेछन् । यसैबीच पाकिस्तान विश्वकप खेल्न भारत नजाने सम्भावना रहेको छ । दुई देशको आन्तरिक राजनीतिको कारण पाकिस्तान नजाने सम्भावना रहेको छ ।

पाकिस्तानले विश्वकपका खेलहरु बंगलादेशमा खेल्ने सम्भावना छ । भारत पनि एसिया कप खेल्न पाकिस्तान नजाने औपचारिक रुपमै जनाएको छ । एसिया कप आगामी सेप्टेम्बरमा पाकिस्तानमा हुँदैछ । तर एसिया कपमा भारतसँगको खेल भने युएईमा हुने उच्च सम्भावना छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.