Nepal Times
Nepal Times
3
Shares

‘सकम्बरी’ले गर्याे प्रतिलिपि अधिकारको उल्लंघन/प्रकाश सपुतले ‘सकम्बरी’सच्याउनु पर्ने

‘सकम्बरी’ले गर्याे प्रतिलिपि अधिकारको उल्लंघन/प्रकाश सपुतले ‘सकम्बरी’सच्याउनु पर्ने

११ वैशाख, काठमाण्डौ ।
गायक एवं निर्माता प्रकाश सपुतको नयाँ गीत ‘सकम्बरी’ले प्रशंसा र आलोचना खेप्दै करोड क्लबमा पुगिसकेको छ । गीत र भिडिओ सार्वजनिक भएपछि सर्वाधिक चर्चा कमाएको सपुतको सकम्बरी (फूलमाया) गीतको भिडियोलाई लिएर पारिजात स्मृति केन्द्रले आफ्नो धारणा सार्वजनिक गरेको छ ।

केन्द्रले सकम्बरी (फूलमाया) गीतको भिडियोमा पारिजातको कृति ‘शिरीषको फूल’का दुई पात्रहरूको नाम सकम्बरी र सुयोगबीर राखेकोमा आपत्ति जनाएको छ । साहित्यकार पारिजातद्वारा लिखित उपन्यास शिरीषको फूलकी पात्र सकम्बरीको चरित्रसँग गीतको भिडियोको पात्रको कुनै पनि प्रकारले मेल नखाने भन्दै केन्द्रले भनेको छ, “कुनै पनि प्रकारले मेल नखाने पात्रलाई सकम्बरी नाम दिनु, पुरुष पात्रलाई सुयोगबीर नाम दिनु र शिरिषको फूल पुस्तकसमेत देखाउनुलाई संयोग मात्र मान्ने अवस्था देखिएन ।

यसरी पारिजातद्वारा लेखिएको कृति प्रयोग गर्नका लागि यस केन्द्रसँग कुनै स्वीकृति लिएको छैन । यसबाट प्रतिलिपि अधिकारको पनि उल्लंघन भएको छ ।” पारिजात स्वयं नारी सशक्तिकरणका लागि लडेको व्यहोरासमेत स्मरण गर्दै महिलाको छविलाई सामान्यीकरण गरी नकारात्मक रुपमा प्रस्तुत गरिएको गीतको छायांकनमा अप्रासंगिक रूपमा शिरीषको फूल पुस्तक प्रयोग गरिएको भन्दै केन्द्रले आपत्ति जनाएको छ।

“अनिधिकृत छायांकनबाट सुप्रशिद्ध साहित्यकार पारिजातको कृतिमाथि अन्याय हुनुका साथै उहाँको छविलाई अमर्यादित पार्ने काम भएको पारिजात स्मृति केन्द्रको ठहर छ” केन्द्रले भनेको छ, “स्मृति केन्द्र सर्जकको स्वतन्त्रताप्रति सदैव संवेदनशील रही आएको छ ।लेखकीय स्वतन्त्रताको पक्षधर रहेको पनि जानकारी गराउँदै प्रकाश सपुतलाई क्षमायाचना गर्न तथा त्यस्ता दृष्यहरु सच्याउन माग गर्दछ ।”

‘सकम्बरी’ले सात दिनमै एक करोडभन्दा बढी पटक हेरिने नेपाली गीतको युट्युब रेकर्ड राखेको छ । सकम्बरी ११ औं दिनसम्म आउदा पनि यो गीत रिलिज भएकै दिनदेखि युट्युबको नेपाल ट्रेन्डिङको शीर्षस्थानमा रहँदै आएको छ । गीतले महिलाको भावनामाथि खेलबाड गरेको आरोप लाग्दै आएपनि गायक सपुतले भने यसको खण्डन गर्दै आएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.