६ जेठ, काठमाण्डौ ।
आज विहान सवा ९ बजे जनकपुरधाम विमानस्थलबाट काठमाडौं आउन लागेका बुद्ध एयरका यात्रुहरु मुसाका कारण समयमै गन्तब्यतर्फ जानबाट बञ्चित भएका छन् । ४९ यात्रुहरु सवार बुद्ध एयरको विमानमा मुसा भेटिएपछि उक्त उडान स्थगित भएको छ । विमान काठमाडौं उड्न लागेकै बेला मुसा भेटिएको थियो ।
विमानमा यात्रुले मुसा देखेपछि विमान होल्ड गरिएको बुद्ध एयरका कर्मचारी सन्दीप लामाले जानकारी दिए । उनका अनुसार प्राविधिक जाँचका लागि केही बेर विमान होल्ड गरिएको छ । अब उडान परीक्षणपछि मात्र हुनेछ । विमान होल्डपछि यात्रुहरु अलपत्र परेका छन् । यो जहाज साढे ८ बजे जनकपुरमा पुगेको थियो ।
तर जहाज काठमाडौंको लागि उड्ने बेलामा यात्रुले मुसा देखेको नेपाल नागरिक उड्डयन प्राधिकरणका प्रवक्ता जगन्नाथ निरौलाले जानकारी दिए । ‘काठमाडौंबाटै उडेको जहाज थियो। त्यहाँबाट यात्रु बोकेर काठमाडौं आउन लागेको थियो। यात्रुहरू बसिसकेका थिए।
त्यसबेला यात्रुले मुसा देखेछन्,’ उनले भने। जहाजमा मुसा देखिएको खबर पाएपछि काठमाडौंबाट इन्जिनियरको टोली जनकपुर जाने तयारीमा छन् । इन्जिनियरहरूले जहाजको परीक्षण गरेपछि मात्रै उडान गरिने उनले बताए । निरौलाले यात्रु अर्को जहाजमार्फत काठमाडौँ ल्याइएको पनि बताए ।
